თითქმის ორი წელი გავიდა, თბილისის მეტროს მემანქანეების პრობლემები და მოთხოვნები კვლავ არ იცვლება. დასაქმებულები 2016 წლის მსგავსად, ხელფასების 45-პროცენტიან ზრდას ითხოვენ. მეტროს მემანქანები ამბობენ, რომ საშუალო ხელფასი 1138-1180 ლარია, 45 პროცენტიანი მატების შემთხვევაში კი საშუალოდ 1600 ლარი იქნება. წინასაგაფიცვო პერიოდის გასვლამდე მხოლოდ ერთი კვირა დარჩა.

ერთობა 2013-ისა და მეტროს მემანქანის, რატი კაპანაძის თქმით, საპროტესტო ტალღას 250-მდე თანამშრომელი უერთდება, მათ შორის სხვადასხვა დეპარტამენტიდან. მისი თქმით, უკეთესი შრომის პირობებისთვის ბრძოლა წლების წინ დაიწყეს, 2016 წელს სატრანსპორტო კომპანიამ სასამართლოს მიმართა და მემანქანეებს გაფიცვა ერთი თვით გადაუვადეს.

ამ პერიოდის განმავლობაში მემანქანეები კომპანიასთან ორ საკითხზე - ღამის საათებში დამატებით ანაზღაურებასა და სტაჟის მიხედვითა ხელფასის გადახდაზე შეთანხმდნენ. ხელფასების ზრდასთან დაკავშირებით, სატრანსპორტო კომპანიამ მემანქანეების პირობა მისცა, რომ 2017 წლის ბიუჯეტში ხელფასების მატების საკითხს გადახედავდა.

"2016 წლიდან, 2017 წელი მოლაპარაკების გზით გავიარეთ. ახალი ადმინისტრაციის პირობებში კი პირობები ისევ შეიცვალა", - ამბობს რატი კაპანაძე On.ge-სთან საუბრისას.

თბილისის მთავრობის ცვლილების შემდეგ სატრანსპორტო კომპანიის ახალმა ადმინისტრაციამ ხელფასების პრობლემის მოსაგვარებლად ვადა იანვრამდე ითხოვა. მემანქანეების ცნობით, შეთანხმება ვერ შეძლებს, ახალი ადმინისტრაცია კი პოზიციის დასაფიქსირებლად დროს წელავს. მეტროს თანამშრომლებმა, სოლიდარობის ქსელის დახმარებით, ისევ წინასაგაფიცვო პერიოდი გამოაცხადეს.

ჯანდაცვის სამინისტრომ ისევ მედიატორი გამოყო, სატრანსპორტო კომპანია კი მემანქანეებთან ისევ მოლაპარაკებებს აწარმოებს.

ჯანდაცვის სამინისტროს მედიატორის, ნათია ჩიტაშვილის განცხადებით, პროცესში დაახლოებით ათი დღეა რაც ჩაერთო. მემანქანეების გაფიცვამდე ერთი კვირა რჩება, მხარეები კი, ჯერ ვერ შეთანხმდნენ.

"ყველაფერი გაკეთდა, რომ მხარეები მომზადებულები მოვიდნენ. ორივე მხარე მოლაპარაკებისკენაა ორიენტირებული", - უთხრა On.ge-ს ნათია ჩიტაშვილმა.

სატრანსპორტო კომპანიის პრესსამსახურში ამბობენ, რომ მოლაპარაკებები მიმდინარეობს და პროცესის დასრულებამდე ვერ ისაუბებენ.

"ჩართულია ჯანდაცვის სამინისტროს წარმომადგენელი, როგორ მედიატორი. მოლაპარაკებებში მონაწილეობს როგორც სატრანსპორტო კომპანია, ისე მედიატორი. მოლაპარაკებების პროცესს მიმდინარეა და ამასთან დაკავშირებით განმარტებას რამდენიმე დღეში გავაკეთებთ", - უთხრეს On.ge-ს თბილისი სატრანსპორტო კომპანიაში.

პერსონალურ მონაცემთა დაცვის ინსპექტორის აპარატში უკვე სწავლობენ თბილისის მეტროს თანამშრომლების მიერ დასახელებულ ერთ საკითხს. კომპანიის თანამშრომლები აღნიშნავენ, რომ უსაფრთხოებაზე ზედამხედველობის მიზნით მეტროში დაყენებულ კამერებს დასაქმებულთა კონტროლისა და შრომის დისციპლინური დარღვევების აღმოჩენისთვის იყენებს.