ამერიკის მთავრობამ 11 სექტემბრის ტერაქტზე კონგრესის ანგარიშის ის საიდუმლო თავი გამოაქვეყნა, რომელშიც საუდის არაბეთზეა ყურადღება გამახვილებული. ინფორმაციას ნიუ-იორკ პოსტი ავრცელებს.

გამოქვეყნებული ანგარიშის აღნიშნულ ნაწილში, საკითხი ეხება ამერიკაში ჩასულ საუდის არაბეთის მოქალაქეებს, რომლებსაც, აშშ-ს საგამოძიებო სამსახურის ბრალდებით, თვითმფრინავის გამტაცებლებთან კონტაქტი ჰქონდათ და იცოდნენ, მათი გეგმების შესახებ.

მოგვიანებით, გამოძიებამ ვერანაირი მტკიცებულება იპოვა, რაც საუდის არაბეთის მთავრობის ტერაქტში მონაწილეობას დაადასტურებდა.

თუმცა, კანონმდებლები და დაღუპულთა ოჯახის წევრები, რომლებსაც არ სჯეროდათ, რომ საუდის არაბეთთან დაკავშირებული ყველა დეტალი გამოძიებული იყო, წლების განმავლობაში ითხოვდნენ გამოძიების საიდუმლო მასალების გამოქვეყნებას.

ამერიკის ყოფილმა პრეზიდენტმა ჯორჯ ბუშმა აღნიშნული თავი გაასაიდუმლოვა, რათა თავიდან აერიდებინა საუდის არაბეთის გაღიზიანება, დაზვერვის წყაროების და მათი გამოძიების მეთოდების გამოაშკარავება.

ცოტა ხნის წინ, ბარაკ ობამამ გამოსცა ბრძანებულება, რის შედეგადაც, დღეს, აღნიშნული თავები საჯარო გახდა.