შინაგან საქმეთა სამინისტროს ინფორმაციით, ბავშვების მიერ ბავშვზე ძალადობის ამსახველ ვიდეოზე გამოძიება დაიწყეს. ვიდეომასალაში ჩანს როგორ აიძულებენ ბავშვები ბავშვს სავარაუდო სექსუალური კავშირის შესახებ ისაუბროს. ბავშვის სახე დაფარული არაა, ისმის მისი სავარაუდო სახელი და გვარი.

"გამოძიების ამ ეტაპზე დადგენილია, რომ აღნიშნული ვიდეო YouTube-ზე 2017 წლის სექტემბრის თვეში აიტვირთა, თუმცა სოციალურ ქსელში მიმდინარე წლის 20 აპრილს გავრცელდა. სამართალდამცველებმა დაადგინეს ვიდეოში დაფიქსირებული არასრულწლოვანი. დადგენილია ის პირიც, ვინც სოციალურ ქსელში ვიდეო ატვირთა, რომელიც, ასევე, არასრულწლოვანია. გამოძიების პირველადი ინფორმაციით, ორივე არასრულწლოვანი ერთი სკოლის მეშვიდე-მერვე კლასების მოსწავლეა", - აღნიშნულია შსს-ს განცხადებაში.

შინაგან საქმეთა სამინისტროს ცენტრალური კრიმინალური პოლიციის დეპარტამენტი საქმეს სსკ-ს 140-ე და 157-ე პრიმა მუხლების მეორე ნაწილებით დაიწყო. დანაშაული 5-დან 8 წლამდე ვადით თავისუფლების აღკვეთას ითვალისწინებს.

ამავე თემაზე: ომბუდსმენი: სოციალურ ქსელებში გავრცელებული ვიდეო ბავშვების მიერ ბავშვზე ძალადობა იკვეთება