გიორგი მარგველაშვილი ბათუმში საკონსტიტუციო სასამართლოს მოსამართლეებსა და თავმჯდომარეს, გიორგი პაპუაშვილს შეხვდა.

პრეზიდენტის ადმინისტრაციის ინფორმაციით, მარგველაშვილმა კიდევ ერთხელ გამოხატა მხარდაჭერა საკონსტიტუციო სასამართლოს მოსამართლეების მიმართ, მას შემდეგ, რაც კონსულტაციის მიზნით გიორგი პაპუაშვილს შეხვდა. საკონსტიტუციო სასამართლოს თავმჯდომარემ რამდენიმე თვის წინ რუსთავი 2-ის პირდაპირ ეთერში განაცხადა, რომ იუსტიციის მინისტრის თეა წულუკიანის დავალებით, გარკვეული პირები მისი პირადი ცხოვრების მასალების გასაჯაროებას გეგმავდნენ.

მარგველაშვილმა შეხვედრაზე საკონსტიტუციო სასამართლოს მნიშვნელობას გაუსვა ხაზი: "საკონსტიტუციო სასამართლო ყოველთვის ასრულებდა და ასრულებს უმნიშვნელოვანეს როლს ჩვენი სახელმწიფოს სამართლებრივი და დემოკრატიული ფუნქციონირების თვალსაზრისით. ეს არის უმნიშვნელოვანესი ორგანო არა მარტო საქართველოს მსგავსი ახალი დემოკრატიებისთვის, არამედ დღეს, ტრადიციული ევროპაც საკონსტიტუციო სასამართლოს პოზიციებიდან გამომდინარე ავითარებს თავის დემოკრატიულ სისტემას. გამომდინარე იქიდან, რომ რამოდენიმე კვირისა თუ თვის წინ, საკონსტიტუციო სასამართლოს თავმჯდომარემ დააფიქსირა საკუთარი წუხილი და პოზიცია იმასთან დაკავშირებით, რომ გარკვეული ზეწოლის მცდელობას ჰქონდა ადგილი, მე კიდევ ერთხელ დავუდასტურე საკონსტიტუციო სასამართლოს მოსამართლეებს ჩემი მხარდაჭერა და მჯერა, რომ ისინი გადაწყვეტილებებს მხოლოდ საკუთარი რწმენის საფუძველზე მიიღებენ".