გიორგი მარგველაშვილმა ვეფხია ბაქრაძის შეწყალების საქმეზე ქართული ოცნებისა და ევროპული საქართველოს წევრებს უპასუხა. პრეზიდენტმა კიდევ ერთხელ აღნიშნა, რომ მის წინააღმდეგ "ბინძური შავი პიარის ტალღა" დაიწყო.

"რამდენიმე დღის განმავლობაში საზოგადოებამ იხილა და ნათლად დაინახა კიდევ ერთი უბინძურესი შავი პიარის ტალღა, რომელიც ამაზრზენად დაიწყო და საცოდავად დამთავრდა. ჩვენ ამ მიმართულებით, რა უნდა დაიხვეწოს, დავიწყეთ კონსულტაციები და დავხვეწავთ კიდევაც".

ვაკეში 25 წლის ქალის მკვლელობაში ბრალდებულის შეწყალებაზე, გიორგი მარგველაშვილის განმარტების შეფასებისას დეპუტატებმა პრეზიდენტს მეტი პასუხიმგებლობის გამოჩენისკენ მოუწოდეს. ქართული ოცნების დეპუტატმა, ვანო ზარდიაშვილმა განაცხადა, რომ ასეთი შემთხვევის შემდეგ პრეზიდენტი უნდა გადადგეს.

პრეზიდენტის ადმინისტრაციის უფროსის გიორგი აბაშიშვილის თქმით, საქართველოს პარლამენტში ევროპული საქართველოსა და ქართული ოცნების მონაწილეობით ახალი საკონსტიტუციო უმრავლესობის ფორმირების პროცესი მიმდინარეობს.

პრეზიდენტ გიორგი მარგველაშვილის განცხადებით, შეწყალების კომისია ძალადობრივი დანაშაულის საქმეებზე შეწყალების აქტების გამოცემას წყვეტს, იმ დრომდე, სანამ კონსულტაციებს არ გაივლიან შეწყალების პროცესის "ყველა აქტორთან".