ერთიანი ნაციონალური მოძრაობა აჭარის ავტონომიურ რესპუბლიკაში პრეზიდენტის რწმუნებულად ზურაბ პატარაძის დანიშვნას კიდევ ერთხელ ეხმაურება, აღნიშნული კანდიდატურის წარდგენასთან დაკავშირებით არგუმენტებს ითხოვს და მარგველაშვილის სახელზე წერილობით მიმართვას ამზადებს.

აჭარის ავტონომიური რესპუბლიკის უმაღლესი საბჭოს ფრაქცია ერთიანი ნაციონალური მოძრაობის მდივანმა, პეტრე ზაბმახიძემ განმარტა, რომ პრეზიდენტმა დამატებით უნდა განმარტოს, რის საფუძველზე მიიღო აღნიშნული არასწორი გადაწყვეტილება:

"ვითხოვ დამატებით მოტივაციას და არგუმენტაციას იმისას თუ რა საფუძველზე დაყრდნობით იქნა მიღებული ეს არასწორი გადაწყვეტილება. ამასვე ითხოვს არასამთავრობო სექტორის ძირითადი ნაწილი. მე ვფიქრობ, რომ საქართველოს პრეზიდენტმა და მისმა აპარატმა უნდა დაასაბუთოს ის გადაწყვეტილება, რომელიც ავტონომიური რეგიონის პირველი პირის დანიშვნასთან დაკავშირებით მიიღეს".

პარლამენტის ვიცე-სპიკერის, მურმან დუმბაძის თქმით კი, პრეზიდენტისა და პრემიერმინისტრის გადაწყვეტილება არაკონსტიტუციურია:

"სურს საქართველოს პრეზიდენტს ეს ადამიანი დასვას აჭარის ავტონომიის პირველ პირად ანუ ლიდერად. ეს ადამიანიც ხელს აწერს უკანონობას. ადამიანი, რომელიც ხელს აწერს ანტიკონსტიტუციურობას, ხელს აწერს უკანონობას, ის ადამიანი სამართალს ვერასოდეს ვერ დაამყარებს რეგიონში. ამიტომ, მოვუწოდებ აჭარის უმაღლესი საბჭოს თითოეულ წევრს, ვისაც ერგება დღეს ხელის აწევა, არ დაუჭირონ მხარი ზურაბ პატარაძის კანდიდატურას".

გუშინ, გიორგი მარგველაშვილის განკარგულებით, გადადგა აჭარის ავტონომიური რესპუბლიკის მთავრობა. პრეზიდენტმა სახელმწიფო რწმუნებულად აჭარაში ზურაბ პატარაძე დანიშნა.

მთავრობის ახალი შემადგენლობის დამტკიცებამდე, უფლებამოსილებას განახორციელებს სახელმწიფო რწმუნებული და მისი ადმინისტრაცია.