საქართველოს ახალგაზრდა იურისტთა ასოციაციის ინფორმაციით, რუსეთის სახელმწიფო მედიაჰოლდინგის შვილობილ კომპანიას NTV-PLUS-ს საქართველოში ავტორიზაცია ვერ უნდა გაევლო. საიაში აღნიშნავენ, რომ კომპანიისთვის ავტორიზაციის გავლის დროს კანონმდებლობით სამეწარმეო რეესტრში რეგისტრაცია აუცილებელი იყო.

არასამთავრობო ორგანიზაციაში განმარტავენ, რომ რუსული სახელმწიფო მედიაჰოლდინგი საქართველოში მაუწყებლობას გავლილი ავტორიზაციის პირობებშიც ვერ შეძლებს.

"რეესტრში რეგისტრაცია წარმოშობს ახალ სუბიექტს, რომელიც ვერ იქნება დღეს თანამგზავრული ტრანზიტული მაუწყებლობის მომსახურებაზე ავტორიზებული პირი - ნტვ-პლუსი", - აღნიშნავენ საიაში.

არასამთავრობო ორგანიზაციაში მიიჩნევენ, რომ საქართველოს კომუნიკაციების ეროვნულმა კომისიამ სრულყოფილად უნდა შეისწავლოს აღნიშნული საკითხი და შეუჩეროს ნტვ-პლუსს ავტორიზაცია.

უმსხვილესი რუსული მედიაჰოლდინგის, რუსული სახელმწიფო კომპანიის, გაზპრომ-მედიას საქართველოს სატელევიზიო ბაზარზე შემოსვლის შესახებ ინფორმაცია რამდენიმე დღის წინ გავრცელდა. კომპანიის ქართულ ბაზარზე შემოსვლას, გამოეხმაურა НТВ-плюс-ისგენერალური დირექტორი, მიხეილ დიომინი.

"გეოგრაფიული ექსპანსია, ჩვენს სტრატეგიულ ამოცანებში შედის. საქართველო, თავისთავად, პერსპექტიული ბაზარია, თუმცა ჩვენ საქართველოში მაუწყებლობის დაწყებას არ განვიხილავთ მხოლოდ ბიზნეს საქმიანობად. უამრავი ასპექტით, საქართველოში მაუწყებლობის დაწყება ჩვენთვის სოციალურ მისიას წარმოადგენს. ჩვენ, ასევე, არ გამოვრიცხავთ მომავალში დსთ-ს ქვეყნებში შესვლას", - ამბობს ის.

ამავე თემაზე: