ერევანში ოპოზიციის მომხრეებმა სამოქალაქო დაუმორჩილებლობის აქცია დაიწყეს. ინფორმაციას რადიო თავისუფლების ადგილობრივი ბიურო ავრცელებს.

ისინი სომხეთის პრემიერ-მინისტრის თანამდებობაზე ყოფილი პრეზიდენტის, სერჟ სარგსიანის კანდიდატურას აპროტესტებენ. პარლამენტში სარგსიანის კანდიდატურას 17 აპრილს უნდა უყარონ კენჭი.

აქციის ორგანიზატორმა, სამოქალაქო შეთანხმების ლიდერმა, ნიკოლ პაშინიანმა აქციის მონაწილეებთან ერთად ერევნის ცენტრში რამდენიმე ქუჩა გადაკეტა. მათ შეუერთდნენ სტუდენტები და მჯდომარე აქცია მოაწყვეს. მეტროს მუშაობა ათი წუთით იყო შეწყვეტილი.

მსვლელობის მონაწილეები ამბობენ, რომ მათი აქცია მშვიდობიანი ხასიათისაა და პოლიციასთან დაპირისპირების სურვილი არ აქვთ.

მარტში სომხეთის პარლამენტმა პრეზიდენტი პირველად აირჩია, რითაც 2015 წლის საკონსტიტუციო რეფორმა დასრულდა. ქვეყანა მმართველობის საპარლამენტო სისტემაზე გადადის და ქვეყნის მმართველი პრემიერ-მინისტრი იქნება. მმართველმა რესპუბლიკურმა პარტიამ პრემიერის კანდიდატად სერჟ სარქისიანი დაასახელა, რომელსაც 2008 წლიდან პრეზიდენტის თანამდებობა ეკავა.