ბათუმში, ივანე მესხის ქუჩის მოსახლეობა წყლის, გაზის, გზის და გარე განათების არარსებობის გამო ქალაქის მერიას საპროტესტო აქციებით ემუქრება. პირველ არხთან ინტერვიუში მაცხოვრებლები აცხადებენ, რომ უკვე რვა წელია მერია პრობლემების მოგვარებას პირდება, თუმცა უშედეგოდ.

ადგილობრივების თქმით, მოუწესრიგებელი ინფრასტრუქტურის გამო წვიმაში მოზარდებს სკოლაში სიარული უჭირთ. მათივე თქმით, ქუჩაზე არ არის გარე განათებაც, რაც ღამე გადაადგილებას ართულებს.

ადგილობრივი ირმა შაინიძე ამბობს, რომ უკვე რვა წელია ელოდება ნებართვას საცხოვრებელი სახლის გადასახურად. სახლში წვიმის დროს წყალი ჩადის და კედლებს აზიანებს, მერია კი მშენებლობის დასრულების უფლებას არ აძლევს, რადგან ივანე მესხის ქუჩაზე, სავარაუდოდ, მაგისტრალის მშენებლობა იგეგმება.

ამასთან დაკავშირებით ბათუმის მერი ლაშა კომახიძე აცხადებს, რომ ადგილობრივების პრობლემებს იცნობს, მაგრამ სავარაუდო მშენებლობის გამო მათ მოგვარებას ვერ ახერხებს:

"მაგისტრალის გაყვანის შემთხვევაში ის დაექვემდებარება ექსპროპრიაციას და იძულებული გახდებიან ეს ადამიანები დაანგრიონ და დაშალონ საკუთარი ქონება. ასე, რომ ეს პროცესები ისევ მოსახლეობის სასიკეთოდა, თუმცა, რა თქმა უნდა, ამის გაგრძელება არ შეიძლება წლების განამვლობაში. ჩვენ უკვე დაწყებული გვაქვს ამ მხრივ მუშაობა."

მოსახლეობა ამბობს, რომ თუ ათი დღის განმავლობაში მერიას და მუნიციპალიტეტს რეაგირება არ ექნება ისინი ბათუმის პორტის ცენტრალურ მაგისტრალს გადაკეტავენ.