საქართველოს შინაგან საქმეთა სამინისტროს ინფორმაციით, თბილისში, ბარნოვის ქუჩაზე ქალის მკვლელობის საქმეზე, დანაშაულის შეუტყობინებლობის ბრალდებით ერთი პირი დააკავეს.

"გამოძიებამ დაადგინა, რომ მიმდინარე წლის 13 აპრილს თბილისში, ბარნოვის ქუჩაზე მომხდარ მკვლელობაში ბრალდებული, რომელიც სამართალდამცველებმა 14 აპრილს თელეთში დააკავეს, შემთხვევის ადგილიდან მიმალვის შემდეგ, თავის ახლობელთან მივიდა და მის სახლში იმალებოდა. ახლობელმა მომხდარი მკვლელობის შესახებ იცოდა, მაგრამ პოლიციას არ შეატყობინა", - აცხადებენ შსს-ში.

გამოძიება განსაკუთრებით მძიმე დანაშაულის შეუტყობინებლობის საქმეზე, საქართველოს სისხლის სამართლის კოდექსის 376-ე მუხლით მიმდინარეობს. დაკავებულს, ბრალის დამტკიცების შემთხვევაში, ორიდან ოთხ წლამდე პატიმრობა ემუქრება.