"ასეთი ტიპის ინიციატივები, საზიანოა გამოძიების ინტერესებისთვის", - დიღმის მასივში მომხდარი ინციდენტიის შემდეგ, ნიგერიელ სტუდენტებსა და ადგილობრივებს შორის გამართულ ამხანაგური მატჩთან დაკავშირებით, ტოლერანტობისა და მრავალფეროვნების ინსტიტუტი (TDI) განცხადებას ავრცელებს.

TDI მიიჩნევს, რომ მსგავსი ინიციატივა მიმართული უნდა იყოს სტუდენტებისადმი სოლიდარობის გამოხატვისა და საზოგადოებაში შემწყნარებლობისა და მრავალფეროვნების პატივისცემის წახალისებისაკენ:

"მასში ხაზგასმულია შესაძლო დანაშაულის დავიწყების მიზანი და არა ეფექტიანი გამოძიების ჩატარების აუცილებლობა...

უპირველეს ყოვლისა, მომხდარი ფაქტი ობიექტურად, დროულად უნდა იყოს გამოძიებული, ხოლო თანამდებობის პირების მხრიდან დანაშაული და რასიზმი მკაფიოდ დაგმობილი." - ნათქვამია განცხადებაში.

ორგანიზაციის განცხადებით, მნიშვნელოვანია, რომ ხელისუფლების პოზიცია, პირველ რიგში, ძალადობისა და დანაშაულის მკაფიო კრიტიკასა და ადამიანის უფლებების განუხრელ დაცვაზე იყოს აქცენტირებული.

ამხანაგური მატჩის იდეა კახა კალაძეს ეკუთვნის. თბილისის მერმა განაცხადა, რომ თბილისი ტოლერანტული ქალაქია და მსგავსი ინციდენტი "ძალიან ცუდი სანახავი იყო".

8 აპრილს, თბილისში, დიღმის მასივში შავკანიანებს სცემეს. შსს-მ გამოძიება ძალადობის მუხლით დაიწყო, თუმცა უწყებაში აღნიშნეს, რომ დისკრიმინაციული მოტივის გამოკვეთის მიმართულებითაც მუშაობენ.