თბილისის მერი, კახა კალაძე თბილისში, დიღმის მასივში მომხდარი ინციდენტის მონაწილეებს, შავკანიანებსა და ადგილობრივებს შორის, ამხანაგური მატჩის გამართვის ინიციატივით გამოდის. ამის შესახებ თბილისის მერმა დედაქალაქის მთავრობის სხდომაზე განაცხადა.

კახა კალაძემ ფეხბურთის ფედერაციის პრეზიდენტს, ლევან კობიაშვილს სთხოვა ამხანაგური მატჩის კვირის ბოლომდე ორგანიზება.

"თბილისი არის ყველაზე ტოლერანტული ქალაქი და ამას არ ჩამითვლით გადამეტებულად. რაც მოხდა, ამას გამოძიება დაადგენს, მაგრამ ეს ყველაფერი ძალიან ცუდი სანახავი იყო. ქართველებს არ გვჩვევია ასეთი მიდგომები და დამოკიდებულებები", - განაცხადა კახა კალაძემ.

თბილისის მერი მოუწოდებს ყველა დაინტერესებულს პირს ჩაერთოს ამ ინიციატივაში და დავიწყებას მისცეს "ცუდი ლაქა".

თბილისში, დიღმის მასივში შავკანიანებს სცემეს. შემთხვევა 8 აპრილს, საღამოს მოხდა. შინაგან საქმეთა სამინისტრო საქმეს ძალადობის მუხლით იძიებს.