ნიგერიელი სტუდენტების ადვოკატი შოთა თუთბერიძე ფიქრობს, რომ თბილისის მერის ინიციატივა ამხანაგური თამაშის შესახებ არასერიოზულია და აქცენტი გამოძიების ობიექტური წარმართვიდან შერიგებაზე გადააქვს.

შოთა თუთბერიძის თქმით, კახა კალაძის ინიციატივა რასობრივ დანაშაულს ახალისებს.

"ვფიქრობ, რომ სახელმწიფოს და ყველა საჯარო მოხელის ინტერესი გამოძიების ობიექტურად, სწრაფად და ეფექტურად ჩატარება უნდა იყოს და არა იმის თხოვნა, რომ დავივიწყოთ ქმედება, რომელიც შესაძლებელია სისხლის სამართლის დანაშაული იყოს და რომელზეც გამოძიება მიმდინარეობს. ეს რასობრივი დანაშაულის კიდევ ერთი წახალისებაა", - განუცხადა On.ge-ს ადვოკატმა.

მისი თქმით, სტუდენტები გამოძიების დასრულებას ელოდებიან და მატჩის ორგანიზებას სერიოზულად არ განიხილავენ.

"როცა დამნაშავეები პასუხისგებაში მიეცემიან, მას შემდეგ ვიმსჯელებთ ვითამაშოთ თუ არა", - ამბობს შოთა თუთბერიძე.

თბილისის მერი, კახა კალაძე თბილისში, დიღმის მასივში მომხდარი ინციდენტის მონაწილეებს, შავკანიანებსა და ადგილობრივებს შორის, ამხანაგური მატჩის გამართვის ინიციატივით გამოვიდა.