მურმან აშოთია ერთ-ერთია იმ მუშებიდან, რომელიც დღეს, გამთენიისას ტყიბულში, მინდელის ქვანახშირის მომპოვებელ შახტში დაშავდა. ჟურნალისტის კითხვაზე, გააგრძელებდა თუ არა ამ შემთხვევის შემდეგ ისევ იქ მუშაობას, მეშახტეს თვალზე ცრემლი ადგება და პასუხობს, რომ მეტი გზა არ აქვს, რადგან ეს მისი შემოსავლის ერთადერთი წყაროა.

მურმან აშოთია იხსენებს, რომ 21-ე წელია, რაც მინდელის შახტში მუშაობს და მუშების დაღუპვის უამრავი შემთხვევა ახსოვს.

ტვ პირველის ჟურნალისტთან საუბრისას მეშახტე მომხდარის დეტალებს იხსენებს და ამბობს, რომ სამთო დარტყმა მოხდა, რაც უსაფრთხოების ნორმებთან არაფერ შუაში არაა:

"მხედველობა არ იყო საერთოდ. შემოვტრიალდი და წვრილ-წვრილი ნატეხები შემეყარა სახეში. ხელი ავიფარე და შევტრიალდი, რომ არ შევტრიალებულიყავი და სწორად გავჩერებულიყავი, ჰაერის მასა დამარტყამდა და სადაც ნახშირს ვყიდი ხოლმე იქ გადამაგდებდა. გაზი ან რაიმე აალებადი რომ ყოფილიყო მე დამწვარი ვიქნებოდი".

ის ახლა ტყიბულის საავადმყოფოში მკურნალობს. შახტში კიდევ ორი დაშავებულის მდგომარეობა სტაბილურად მძიმეა.

ტყიბულში, მინდელის სახელობის შახტში 6 მუშა დაიღუპა, 3 დაშავდა.