ტყიბულში, შახტის ჩამოშლის შედეგად, დაშავებული სამი მეშახტიდან ორის მდგომარეობა სტაბილურად მძიმეა.

ჯანდაცვის სამინისტროს ინფორმაციით, ორივე პაციენტი კონტაქტურია, აღენიშნებათ ინტრაკრანიალური ტრავმა, უტარდებათ კვლევები. ისინი გადაყვანილი არიან ქუთაისის ინტერვენციულ კლინიკაში. მესამე დაშავებული ზედა კიდურის დაზიანებით მკურნალობას ტყიბულის კლინიკაში აგრძელებს.

უწყებაში ამბობენ, რომ ადგილზე ვითარების შესასწავლად უკვე გასულია შრომის ინსპექტორთა ჯგუფი.

ტყიბულში, მინდელის სახელობის შახტში 6 მუშა დაიღუპა, 3 დაშავდა. გამოძიების პირველადი ინფორმაციით, შახტის ერთ-ერთ გვირაბში მოხდა კედლების დეფორმაცია, რასაც ჭერის ჩამოშლა მოჰყვა.