სექსუალურ შევიწროებაში ბრალდებული ზვიად დევდარიანის თქმით, მისი დისკრედიტაციით დაინტერესებული მმართველი გუნდი და ოპოზიციური პარტია იყო. ამის შესახებ მან პირველი არხის ეთერში ისაუბრა.

დევდარიანი ბრალდებებს საზოგადოებრივი მაუწყებლის სამეურვეო საბჭოს არჩევნებს უკავშირებს და ამბობს, რომ მმართველი გუნდი უკმაყოფილო იყო მისი კანდიდატურით, ვინაიდან უმრავლესობა საზოგადოებრივ მაუწყებელზე გავლენაში დაადანაშაულა.

გარდა ამისა დევდარიანი ამბობს, რომ კონკრეტული ოპოზიციური ჯგუფი მისი დისკრედიტაციით სახალხო დამცველისთვის ცდილობდა დარტყმის მიყენებას. დევდარიანი არ ასახელებს რომელ ოპოზიციურ ჯგუფს გულისხმობს.

"ეს არის საპარლამენტო ოპოზიციური პარტია, რომელიც ურტყამდა [ნინო] ლომჯარიასაც და ურტყამდა [ეკა] გიგაურს და ურტყამდა, ფაქტობრივად, ჩვენს ურთიერთობას... შეტევა იყო ლომჯარია-გიგაური-დევდარიანის გუნდზე და ეს არის ჩვეულებრივი მეგობრული, პარტნიორული ურთიერთობა."

ქალთა მიმართ სექსუალურ შევიწროებაში დადანაშაულებული ზვიად დევდარიანი პატივისა და ღირსების აღდგენას სასამართლოს გზით გეგმავს.

17 მარტს ზვიად დევდარიანი ქალთა მოძრაობამ ქალების შევიწროების 10-მდე შემთხვევაში დაადანაშაულა. შსს-მ გამოძიება ადევნების მუხლით დაიწყო.