კერძო ბაგა-ბაღის თანამშრომლებმა ბაღის აღსაზრდელები დღეს, უსაფრთხოების წესების დარღვევით, მსუბუქი ავტომობილის საბარგულით გადაიყვანეს. ბაღის წარმომადგენლის თქმით, ეს პირველად მოხდა და ბავშვები ახლომდებარე ტაძარში, პეტრე-პავლობის დღესასწაულთან დაკავშირებით წაიყვანეს. თუმცა, ბაღის თანამშრომლის ფეისბუკ გვერდზე იძებნება ფოტოები, რომლითაც დასტურდება, რომ ბაგა–ბაღის აღსაზრდელები ავტომობილის საბარგულით რეგულარულად გადაჰყავთ სხვადასხვა ადგილზე.

ფეისბუკ გვერდზე, გაიცანით სამარცხვინო მძღოლები, დღეს გამოქვეყნდა ფოტო, სადაც ჩანს, რომ წითელ Honda Fit-ს, სახელმწიფო ნომრით JJO–564 მცირეწლოვანი ბავშვები საბარგულით გადაჰყავს. სურათი კერძო ბაგა-ბაღის, ტკბილი სახლის წინ, თბილისში, ცაგარელის #94-თან არის გადაღებული.

On.ge ინფორმაციის გადასამოწმებლად დაუკავშირდა ბაღის წარმომადგენელს ელზა ჭელიძეს ოფიციალურად მითითებულ ნომერზე. მან თავდაპირველად არ დაადასტურა, რომ ბავშვები ავტომობილით მათ ბაღს გადაჰყავდა, თუმცა კითხვაზე, ეკუთვნოდა თუ არა მათ აღნიშნული მანქანა, ტელეფონი გაგვითიშა და აღარ გვიპასუხა.

მოგვიანებით, On.ge-ს თავად დაუკავშირდა ახალგაზრდა მამაკაცი, რომელიც შოთა ჭელიძედ გაგვეცნო. მან გვითხრა, რომ "რაღაც გაუგებრობა მოხდა", ის იყო ჟურნალისტი და ეხმარებოდა აღნიშნულ ბაგა-ბაღს. მან დაგვიდასტურა, რომ ბაგა-ბაღს ნამდვილად გადაჰყავდა ბავშვები საბარგულით და მათი მშობლებიც საქმის კურსში იყვნენ:

"ეს ბავშვები მიდიოდნენ ტაძარში, პირველად იყვნენ ასე, ტაძარში ხშირად დადიან ხოლმე და ტაძარში მიდიოდნენ საირმეზე, აქედან ას მეტრშია მაქსიმუმ, არც არის ასი მეტრი და უბრალოდ ტრანსპორტი ვერ მოვიდა, ვერ მოხერხდა ვერანაირად და პეტრე-პავლობის დღესასწაული რადგან იყო, ეს ბავშვები მიდიოდნენ იქ. მშობლები საქმის კურსში იყვნენ. ყველაფერი წესრიგში იყო, და ახლა ვიღაცამ ეს გადაიღო და არ ვიცი, ხელს ვერ დავადებ ვერავის, მაგრამ სავარაუდოდ, კონკურენტი იყო რომელიმე იმიტომ, რომ ბაღები ბევრია გვერდით".

On.ge-მ გაარკვია, რომ ცაგარელის 94-ში, სადაც ბაგა ბაღი ტკბილი სახლი მდებარეობს, რეგისტრირებულია ინდივიდუალური მეწარმე ელზა ჭელიძე. ელზა ჭელიძე ამავე მისამართზე ოჯახთან ერთად ცხოვრობს. შოთა ჭელიძე, რომელიც On.ge-ს დაუკავშირდა და ბავშვების საბარგულით გადაყვანასთან დაკავშირებით განმარტება გააკეთა, ამავე მისამართზეა რეგისტრირებული.

აღნიშნულ ფაქტზე თბილისის სახელმწიფო ბაგა-ბაღების სააგენტო აცხადებს, რომ კერძო ბაღები მათ კომპეტენციაში არ შედის.

საგანგაშო სტატისტიკა

ტრანსპორტისა და გზების ასოციაციის თავმჯდომარემ დავით მესხიშვილმა On.ge-ს განუცხადა, რომ ავტოსაგზაო შემთხვევებისას საქართველოში გარდაცვლილი ბავშვების სტატისტიკა ევროპის ქვეყნების მაჩვენებელთან შედარებით საგანგაშოა. მისი თქმით, მშობლებს არ აქვთ გათავისებული, რომ ბავშვი თვითონ ვერ დაიცავს უსაფრთხოდ მგზავრობის უფლებას და ბავშვის სიცოცხლეს გაუაზრებლად აყენებენ საფრთხის ქვეშ:

"2014-2015 წლებში, წინა წლებთან შედარებით, ბავშვთა სიკვდილიანობა გზებზე 30%-ზე მეტით გაიზარდა. 2013, 2014 და 2015 წლების განმავლობაში საქართველოს მასშტაბით ავტოსაგზაო შემთხვევების დროს 100-ზე მეტი ბავშვია გარდაცვლილი. მოსახლეობის რაოდენობის მიხედვით, ეს სტატისტიკა სამჯერ აღემატება ევროპის მაჩვენებელს, რაც მას საგანგაშოს ხდის".

ორგანიზაცია ეკოტრანსპორტის ხელმძღვანელმა ვასილ ურუშაძემ On.ge-ს უთხრა, რომ არსებული კანონმდებლობით, ბავშვების უსაფრთხოდ გადაყვანის წესების დარღვევისთვის მძღოლს ჯარიმის სახით ეკისრება სანქცია 40 ლარი:

"ესაა იმ შემთხვევაში, თუ ბავშვი სპეციალურ სავარძელში არ ზის და ასევე ჯარიმაა, როცა მას ღვედი არ უკეთია. მთლიანი პასუხისმგებლობა არის ავტოსატრანსპორტო საშუალების მმართველზე, ამ შემთხვევაში მძღოლი, იქნება ეს ტაქსი, მიკროავტობუსი თუ ა.შ."