სახალხო დამცველის 2017 წლის ანგარიშში წერია, რომ საქართველოს ყოფილი პრემიერი და შსს მინისტრის, ივანე მერაბიშვილის თავისუფლებისა და უსაფრთხოების უფლებების აღდგენისთვის საქართველოს ეფექტიანი ღონისძიებები ჯერ კიდევ გასატარებელი აქვს.

სახალხო დამცველი მიიჩნევს, რომ ხელისუფლებამ უნდა გაატაროს ინდივიდუალური და ზოგადი ღონისძიებები ივანე მერაბიშვილის მიმართ დარღვეული უფლების სრულად აღსადგენად.

ომბუდსმენის რეკომენდაციით, მერაბიშლის საკნიდან გაყვანის საქმეზე ხელახალი გამოძიება უნდა ჩატარდეს.

მერაბიშვილის საქმე

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამიდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება.

კონვენციის მე-18 მუხლი უფლებების შეზღუდვათა გამოყენების ფარგლებს ეხება და ადგენს, რომ "ხსენებულ უფლებათა და თავისუფლებათა კონვენციით დაშვებული შეზღუდვები გამოიყენება მხოლოდ და მხოლოდ მათთვის გათვალისწინებული მიზნებისათვის".

28 ნოემბერს ადამიანის უფლებათა ევროპული სასამართლოს დიდმა პალატამ, 17 მოსამართლის შემადგენლობით, ძალაში დატოვა პალატის გადაწყვეტილება.

გაიგეთ მეტი: