ცენტრ პოინტ აჭარის გაყიდვების მენეჯერის, სალომე ჩარკვიანის მამა, თენგიზ ჩარკვიანი ამბობს, რომ შესაძლოა მის შვილს ცენტრ პოინტის მაღალი თანამდებობის პირებმა მოტყუებით მოაწერინეს რაიმე დოკუმენტზე ხელი. ამასთან ის აცხადებს, რომ მის შვილს კომპანიის ფინანსებთან შეხება არ ჰქონია, საქმეს პოლიტიკური სარჩული არ აქვს, ხოლო სალომე ჩარკვიანი მზად არის გამოძიებასთან ითანამშრომლოს:

"დღევანდელ დღეს, როდესაც წერტილოვან დარტყმებს აყენებენ 10 ათას კილომეტრზე, ეძებენ რჩეულიშვილის შვილს და ვერ იპოვეს თბილისში, ყოჩაღ მაშინ საქართველოს მართლმსაჯულებას. თუ მაგის შესაძლებლობა არ აქვს, რომ თბილისში სახლში იპოვონ კაცი. მე განცვიფრებული ვარ".

ჩარკვიანი აცხადებს, რომ ცენტრ პოინტის ირგვლივ მიმდინარე მოვლენები დადგმული სცენარით ვითარდება, თუმცა მისთვის გაუგებარია, სამართალდამცავ ორგანოებს ყოველივე ზემოაღნიშნულით რისი მიღწევა სურთ.

ჩარკვიანის ოჯახის ახლობელი, თაზო გამცემლიძე კი ოჯახის განცხადებას ავრცელებს, სადაც წერია, რომ სალომე ჩარკვიანი იყო აჭარის მაგნოლიის დირექტორი, მას კომპანიის სხვა მშენებლობებთან კავშირი არ ჰქონია და მოქმედებდა ცენტრ პოინტის დამფუძნებლების მითითებით:

"შედეგად შპს მაგნოლიის გარკვეულ დოკუმენტებზე ხელი მოაწერეს და გამოიტანეს ფულადი თანხები. ხაზგასმით აღვნიშნავთ, რომ ეს თანხები მოიხმარეს დამფუძნებლებმა, მათი შეხედულებისამებრ ისე, რომ სალომე არ იყო საქმის კურსში, სად და როგორ იხარჯებოდა ეს თანხები".

გარდა ამისა, დაკავებულმა სალომე ჩარკვიანმა რჩეულიშვილებს წერილიც გაუგზავნა, რომლითაც სთხოვს მათ, სასწრაფოდ მიიღონ ყველა ზომა იმისთვის, რომ ის ციხიდან გამუშვან:

"მაია, ნიკა, დარსო, ძალიან დიდ გაუგებრობაში მოვყევი. კარგად იცით, რომ არანაირი წვლილი არ მიმიძღვის არც ფინანსურ და არც რაიმე სხვა ტიპის გადაწყვეტილებებში და ვიყავი მხოლოდ ფორმალურად ამ პოზიციაზე. ასევე გაუგებარია, რატომ ვიყავი გაფორმებული ამ პოზიციაზე 2006 წლის ჩათვლით, ვინაიდან კარგად მახსოვს, რომ ბევრად ადრე მაქვს განცხადებები დაწერილი. ვერასდროს წარმოვიდგენდი, რომ ჩემი ფაქსიმილიით და მინდობილობით ვინმე ბოროტად ისარგებლებდა და ამ მდგომარეობამდე მიმიყვანდა".

სალომე ჩარკვიანი და ცენტრ პოინტის ბათუმის საინვესტიციო პროექტის ხელმძღვანელი ირაკლი მინდელი 10 ივლისს დააკავეს. გარდა ამისა, პროკურატურამ სისხლისსამართლებრივი დევნა ცენტრ პოინტის დამფუძნებლის, მაია რჩეულიშვილისა და მისი შვილის, გუკა რჩეულიშვილის წინააღმდეგ დაიწყო. თუმცა, გუკა რჩეულიშვილი საგამოძიებო უწყებაში ამ დრომდე არ გამოჩენილა, მასზე ძებნაა გამოცხადებული. მაია რჩეულიშვილის დაპატიმრების მოთხოვნა კი სასამართლომ არ დააკმაყოფილა.

სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება.