საქართველოს ჟურნალისტურ ეთიკის ქარტია მოუწოდებს თბილისის ივანე ჯავახიშვილის სახელმწიფო უნივერსიტეტის დაცვის სამსახურსა და პოლიციას, უნივერსიტეტში მიმდინარე აქციის გაშუქებაზე მომუშავე ჟურნალისტებისთვის უზრუნველყონ უსაფრთხო სამუშაო გარემო.

"თბილისის სახელმწიფო უნივერსიტეტში სტუდენტების მიერ გამართული აქციების გაშუქებისას რამდენიმე ჟურნალისტს ხელი შეეშალა პროფესიული მოვალეობის განხორციელებისას. მათი ცნობით, ლიბერალის ფოტოგრაფს კამერა დაუმტვრიეს, ხოლო ნეტგაზეთის რეპორტიორს ის ტელეფონი წაართვეს, რომლითაც აქციას იღებდა. ლიბერალის კიდევ ერთ ჟურნალისტს, სოფო გოგიშვილს, რომელიც ასევე მობილურით იღებდა უნივერსიტეტში მიმდინარე პროცესს, გაურკვეველმა პირმა ყელში ხელი წაუჭირა და ტელეფონი ჩამოართვა.ფიზიკური ძალადობის შესახებ საუბრობს პალიტრა ნიუსის ჟურნალისტიც.

ჟურნალისტისათვის პროფესიულ საქმიანობაში უკანონოდ ხელის შეშლა სისხლის სამართლის კოდექსით დასჯადი დანაშაულია", - ნათქვამია ეთიკის ქარტიის საბჭოს განცხადებაში.

ქარტიის საბჭო ასევე აცხადებს, რომ თსუ-ში აქციები კვლავაც გრძელდება, მნიშვნელოვანია, მედიის წარმომადგენლებს მიეცეთ თავისუფლად მუშაობის საშუალება და შეძლონ აუდიტორიისთვის ინფორმაციის მიწოდება. შესაბამისად, ჟურნალისტური ეთიკის ქარტიის საბჭო მოუწოდებს სამართალდამცავ ორგანოებს, უნივერსიტეტის დაცვის თანამშრომლებს, უზრუნველყონ ჟურნალისტების უსაფრთხო სამუშაო პირობები.