თბილისის მერიის ინფორმაციით, 12 ივლისს, 11:00 საათზე, სასტუმრო Radisson Blu Iveria-ში დედაქალაქის მერია ახალი ავტობუსების შესახებ პრეზენტაციას გამართავს.

ამას გარდა, თბილისის მერიასა და საავტომობილო კომპანია მან-ს შორის გაფორმდება ხელშეკრულება - დედაქალაქში ახალი, ევროსტანდარტების შესაბამისი ავტობუსების შემოყვანის თაობაზე.

ავტობუსების პროექტის მხარდაჭერის ხელშეკრულებას თბილისის მერიასა და ევროპის რეკონსტრუქციისა და განვითარების ბანკს (EBRD) შორის მოეწერა ხელი. მემორანდუმის თანახმად, EBRD მერიას ავტობუსების შესაძენად 27 მილიონ ევროს გამოუყოფს.

თბილისის მერიის ინფორმაციით, პროექტის ფარგლებში, გათვალისწინებულია თბილისისთვის ახალი, ეკოლოგიურად სუფთა, გაზზე მომუშავე 150 ავტობუსის შეძენა. ავტობუსები იქნება ადაპტირებული შეზღუდული შესაძლებლობის მქონე პირთათვის და ექნება სპეციალური პანდუსები.