26 მარტს, 12:00-ზე, საზოგადოებრივი მაუწყებლის შენობასთან, მედიის წარმომადგენლები ბრიფინგს გამართავენ და პარლამენტს ნარკოპოლიტიკის ადეკვატური რეფორმის განხორციელებისკენ მოუწოდებენ. ამის შესახებ ინფორმაცია სოციალურ ქსელ ფეისბუკში გიორგი ზურაბიშვილმა გაავრცელა.

მედიის წარმომადგენლების პროტესტი პირველი არხის მონტაჟის ყოფილი რეჟისორის, მამუკა ბერძენიშვილის დაკავებას უკავშირდება, რომელსაც ორი გრამი კლუბური ნარკოტიკის შეძენა/შენახვა/პირადი მოხმარებისთვის რვა წლით თავისუფლების აღკვეთა მიუსაჯეს.

გიორგი ზურაბიშვილის თქმით, ნარკოპოლიტიკა და შესაბამისი კანონები სასწრაფო ცვლილებებს საჭიროებს.

"იმის ფონზე, რომ ადამიანები გაუპატიურებისთვის ციხეში ხუთიდან შვიდ წლამდე მიდიან, ხოლო ნარკოტიკების გავრცელებისთვის შეიძლება, ექვსი წლით დაისაჯონ, მცირე ოდენობის ნარკოტიკის ფლობისთვის, ან პირადი მოხმარებითვის რვა წლით პატიმრობის შეფარდება, სახელმწიფოს მხრიდან, არაადამიანური და არაჰუმანური ნაბიჯია", - ნათქვამია განცხადებაში.

პროტესტის ორგანიზატორები ფიქრობენ, რომ აუცილებელია კანონში დოზირებების განსაზღვრა, რათა ნებისმიერი დოზა განსაკუთრებულად დიდ ოდენობად არ ითვლებოდეს.

"ასევე, მიგვაჩნია, რომ მოხმარებისთვის ადამიანები ციხეში არ უნდა მიდიოდნენ და სახელმწიფოს პოლიტიკა ზრუნვაზე ორიენტირებული უნდა იყოს", - ნათქვამია განცხადებაში.

ხვალ, 26 მარტს, საზოგადოებრივ მაუწყებელთან შეკრებილი ადამიანები პირდაპირ ეთერში წაიკითხავენ მიმართვას და პარლამენტს მოუწოდებენ შეიმუშავოს ადეკვატური კანონმდებლობა.

"მამუკა ბერძენიშვილი არ წარმოადგენს საზოგადოებისთვის არანაირ საფრთხეს და მისი ადგილი პენიტენციურ სისტემაში ნამდვილად არ არის (რვა წელი?!)", - ნათქვამია განცხადებაში.

გიორგი ზურაბიშვილი მედიის წარმომადგენლებს მხარდაჭერისკენ მოუწოდებს.

გაიგეთ მეტი: