"ექვსი წუთი და დაახლოებით, 20 წამი. ექვს წუთზე ოდნავ მეტ დროში, ჩვენი 17 მეგობარი ჩვენგან წავიდა", - ამ სიტყვებით დაიწყო Marjory Stoneman Douglas-ის სკოლის მოსწავლემ და იარაღის კონტროლის მოთხოვნით გამართული მსვლელობის ერთ-ერთმა ორგანიზატორმა ემა გონსალესმა თავისი დასამახსოვრებელი გამოსვლა. ამის შესახებ ონლაინგამოცემა motherjones წერს.

გამოცემის ცნობით, გონსალესმა, იმ კლასელების სახელები წაიკითხა, რომლებიც ფლორიდაში, 14 თებერვალს მომხდარ მასობრივ სროლას ემსხვერპლნენ. ამის შემდეგ კი 6 წუთიანი დუმილით მათ ხსოვნას პატივი მიაგო. ყველა მთავარი საკაბელო ტელევიზია გონსალესის გამოსვლას პირდაპირ ეთერში გადასცემდა.

"ყველაზე ხმამაღალი სიჩუმე აშშ-ს სოციალური პროტესტების ისტორიაში", - დაწერა სოციალურ ქსელში ჟურნალისტმა დევიდ კორნმა.

"აღარასდროს განმეორდეს", - ამ სიტყვებს 500 000 აქტივისტი გონსალესის დუმილის საპასუხოდ ამბობდა.

"უკვე ექვსი წუთი და 20 წამი გავიდა, რაც სცენაზე ვდგავარ. დაახლოებით ამ დროის განმავლობაში, თავდამსხმელმა შეწყვიტა სროლა და მიატოვა იარაღი. შეერია სტუდენტებს, გაუჩინარდა და დაჭერამდე, ერთი საათის განმავლობაში, თავისუფლად გადაადგილდებოდა. ვიბრძოლოთ ჩვენი სიცოცხლისთვის, სანამ ის სხვისი საქმეა", — თქვა მან და სცენა დატოვა.

სტუდენტებმა, რომლებიც აშშ-ში იარაღით ძალადობის ეპიდემიაზე საუბრობენ, აღნიშნეს, რომ გონსალესის გამოსვლა ყველაზე დასამახსოვრებელი იყო. სტუდენტებმა თავის გამოცდილებაზე ისაუბრეს და კონგრეს მკვლელობების შესაჩერებლად ქმედითი ნაბიჯების გადადგმისკენ მოუწოდეს.

"იმ ადამიანებს, რომლებიც ფიქრობენ, რომ თინეიჯერებს არაფრის შეცვლა არ შეუძლიათ, გვინდა ვუთხრათ, რომ ჩვენ ვართ ის ერთადერთი ადამიანები, რომლებსაც მსგავსი მოძრაობის დაწყება შეგვიძლია", — თქვა გონსალესის კლასელმა ალექს ვაინდმა.

იარაღის შესყიდვის წესების გამკაცრების მოთხოვნით, აშშ-ს ქალაქებში მოსწავლეთა მასობრივი მსვლელობები მიმდინარეობს. მოსწავლეები იარაღის კონტროლის კანონებს აპროტესტებენ.

მსვლელობები ფლორიდის საშუალო სკოლაში შეიარაღებული თავდასხმას უკავშირდება, რა დროსაც 17 ადამიანი გარდაიცვალა.