ამერიკის შეერთებული შტატები ოკუპირებული აფხაზეთის და ცხინვალის რეგიონის დამოუკიდებლობის ამღიარებელ ქვეყნებს სანქციებს უწესებს და მათი მთავრობების დაფინანსებას კრძალავს. ამის შესახებ, 2018 წლის ბიუჯეტის კანონში ჩაიწერა, რომელსაც დონალდ ტრამპმა 23 მარტს მოაწერა ხელი.

კანონში დაგმობილია რუსეთის მიერ აფხაზეთის და ცხინვალის ოკუპაცია და აკრძალულია იმ ქვეყნების დაფინანსებაც, რომლებმაც დიპლომატიური კავშირი დაამყარეს აფხაზეთის და ოსეთის დე-ფაქტო მთავრობებთან. ასევე აკრძალულია ნებისმიერი პროექტის ან პროგრამის დაფინანსება, რომელიც საქართველოს სუვერენიტეტს არღვევს და რუსეთის მიერ აფხაზეთის და ცხინვალის ოკუპაციას უწყობს ხელს.

ამასთან 2018 წლის ბიუჯეტში აშშ ზრდის საქართველოსადმი მხარდაჭერას ‎105 325 000 აშშ დოლარამდე. შეერთებული შტატების მთავრობა რუსეთის გავლენის და აგრესიის წინააღმდეგ ბრძოლისთვის ევროპისა და ევრაზიის რეგიონზე 250 მილიონ დოლარს გამოყოფს.