აშშ-ს კონგრესი მექსიკის საზღვართან კედლის მშენებლობისთვის 1,6 მილიარდ აშშ დოლარს გამოყოფს. ამის შესახებ აშშ-ს ბიუჯეტის პროექტშია ნათქვამი და პრეზიდენტმა დონალდ ტრამპმა ტვიტერზეც დაწერა, რომ 1,6 მილიარდი დოლარი სამხრეთით კედლის მშენებლობის საწყის ეტაპს მოხმარდება, დანარჩენი კი მომავალში იქნება.

კონგრესმენებმა ბიუჯეტის პროექტზე მუშაობა დაასრულეს და საბოლოოდ, 1,3 ტრილიონი აშშ დოლარი გამოყვეს. კონგრესმა, სადაც რესპუბლიკელთა უმრავლესობაა, 23 მარტს, პარასკევს უნდა დაამტკიცოს ბიუჯეტის პროექტი.

Reuters-ის ინფორმაციით, აზრთა სხვადასხვაობაა რიგ საკითხებში, მათ შორის იმაზეც, უნდა დაიხარჯოს თუ არა ფული აშშ-მექსიკის საზღვართან კედლის აშენებაში.

ბევრი დემოკრატი ეჭვქვეშ აყენებს იმას, თუ რამდენად ჭკვიანური გადაწყვეტილებაა ამგვარი ნაგებობის აშენება. სანაცვლოდ, ისინი მაღალტექნოლოგიური მოწყობილობებისა და ღობეების განთავსების ინიციატიცით გამოდიან, რათა მექსიკიდან არალეგალური მიგრაცია თავიდან აიცილონ. რესპუბლიკელები და თეთრი სახლი შეთანხმებულები იყვნენ, რომ კონგრესს 25 მილიარდი აშშ დოლარი უნდა გამოეყო კედლის ასაშენებლად.