თავდაცვის მინისტრი, თინა ხიდაშელი ნატოს ვარშავის სამიტის შედეგებს აფასებს და ამბობს, რომ საქართველოს გაუჩნდა შანსი, ნატოს წევრ ქვეყნებთან ერთად ერთიანი უსაფრთხოების სისტემის ნაწილი გახდეს:

"საქართველოს გაუჩნდა შანსი ერთიანი უსაფრთხოების სისტემის ნაწილი გახდეს, რომელიც უყურებს, იცავს, პრევენციას ახდენს და აჩერებს მოწინააღმდეგეს. ჩემი აზრით, ჩვენ მთავარ შედეგს მივაღწიეთ იმ ფონზე, როდესაც სამწუხაროდ ნატოს წევრობა დღის წესრიგში არ იყო, რომ წამოვიღეთ თავდაცვისუნარიანობის ყველაზე სასარგებლო, ყველაზე უფრო ფართომასშტაბიანი პროდუქტი, თუ შეიძლება ასე ითქვას, რომელიც ნატოს არაწევრ არცერთ ქყვეყანას არასდროს ჰქონია".

2 დღის წინ პოლონეთის დედაქალაქში ნატოს სამიტი გაიმართა, სადაც მსოფლიო ლიდერებთან ერთად საქართველოს დელეგაციაც იმყოფებოდა. ვარშავის სამიტის ფარგლებში სიტყვით საქართველოს პრეზიდენტი, გიორგი მარგველაშვილიც წარსდგა. გარდა ამისა, შეხვედრები გამართეს თავდაცვისა და საგარეო საქმეთა მინისტრებმა.

სამიტზე მიღებულ კომუნიკეში აღნიშნულია, რომ ალიანსი აღიარებს საქართველოს ტერიტორიულ მთლიანობასა და სუვერენიტეტს, ასევე მოუწოდებს რუსეთს, შეწყვიტოს სამხრეთ ოსეთისა და აფხაზეთის, როგორც დამოუკიდებელი სახელმწიფოების აღიარება. დოკუმენტში ასევე წერია, რომ ნატო არ აღიარებს აფხაზეთსა და რუსეთს შორის 2014 წელს მიღწეულ ე.წ. მოლაპარაკებებს, ამავე ტიპის 2015 წლის მოლაპარაკებას სამხრეთ ოსეთსა და რუსეთს შორის.