გიორგი მარგველაშვილი NATO-ს სამიტის ფარგლებში, ავღანეთის მისიაში მონაწილე ქვეყნების მთავრობის მეთაურების შეხვედრაზე "მტკიცე მხარდაჭერის მისიის" თემაზე სიტყვით გამოვიდა.

საქართველოს პრეზიდენტმა სიტყვით გამოსვლისას ტერორიზმთან ბრძოლაში NATO-ს წევრი და პარტნიორი ქვეყნების ძალისხმევაზე ისაუბრა და აღნიშნა, რომ ტერორიზმის შეკავება საერთო ძალისხმევით მოხდება.

"უსაფრთხოება განვითარების აუცილებელი წინაპირობაა და პირიქით, უსაფრთხოების გარეშე განვითარება არარსებობს" - განაცხადა მან.

მარგველაშვილმა ავღანეთის სამშვიდობო მისიაში საქართველოს როლზეც ისაუბრა და აღნიშნა, რომ მიუხედავად საქართველოს ტერიტორიების ოკუპაციისა, საქართველო იყო და რჩება ერთ- ერთ მთავარ კონტრიბუტორად და ქართველი ხალხის ურყევი ნებაა გახდეს NATO-ს წევრი.

ვარშავის სამიტი, 2016 წელი

ვარშავის სამიტი, 2016 წელი

ფოტო: საქართველოს პრეზიდენტის ადმინისტრაცია

საქართველოს პრეზიდენტმა აღნიშნა, რომ საქართველო აქტიურად უჭერს მხარს ალიანსს მისიის განხორციელებაში და ეხმარება ავღანეთის თავდაცვის და უსაფრთხოების ძალებს.

გიორგი მარგველაშვილის განცხადებით, ოპერაციის წარმატებას დიდი მნიშვნელობა აქვს, რადგან საქართველო ატლანტიკური სივრცის ოჯახის წევრად მიიჩნევს თავს და მისი ამოცანა ნატოში გაწევრიანებაა.

შეხვედრის დასასრულს საქართველოს პრეზიდენტმა მხარი დაუჭირა "მტკიცე მხარდაჭერის მისიის" გაგრძელებას.

საქართველოს პრეზიედნტის ადმინისტრაციის ცნობით, ვარშავის სამიტზე NATO-მ მიიღო გადაწყვეტილება ავღანეთისთვის სამხედრო და ფინანსური დახმარების გაგრძელებასა დასაქართველოსთან, უკრაინასა და მოლდოვასთან პოლიტიკური და პრაქტიკული თანამშრომლობის გაძლიერების შესახებ.