NATO-ს შემდეგი სამიტი ბრიუსელში გაიმართება. ამის შესახებ ნატოს გენერალურმა მდივანმა, იენს სტოლტენბერგმა განაცხადა და დაადასტურა, რომ ჩრდილოატლანტიკური საბჭოს სხდომა შემოდგომაზე საქართველოში გაიმართება:

"ჩვენი ძალისხმევა მიზნად ისახავს საქართველოს თავდაცვისუნარიანობის გაძლიერებას და დახმარებას, რომ ქვეყანამ ნატო-ს წევრობისათვის მომზადების პროცესში პროგრესს მიაღწიოს. ჩვენ ვაღიარეთ ის პროგრესი, რომელსაც საქართველო აღწევს ნატოს წევრობის გზაზე"

სტოლტენბერგმა ასევე აღნიშნა, რომ ნატო კიდევ ერთხელ ადასტურებს ბუქარესტის სამიტზე მიღებულ გადაწყვეტილებას:

"ასევე გამოვხატეთ ძლიერი მხარდაჭერა საქართველოს ტერიტორიული მთლიანობისა და სუვერენიტეტის მიმართ. სწორედ ეს არის მიზეზი თუ რატომ ვნერგავთ სხვადსხვა ელემენტებს არსებით პაკეტში".

ნატოს გენერალური მდივნის თქმით, ნატო აგრძელებს საქართველოს ძლიერ პოლიტიკურ და პრაქტიკულ მხარდაჭერას. ასევე აგრძელებს ნატოს მოკავშირეების მხარდაჭერასაც, რომ მათ ორმხრივი მხარდაჭერა აღმოუჩინონ საქართველოს:

"რამდენიმე ქვეყანამ უკვე გადადგა ნაბიჯი ამ მიმართულებით. მე ვაპირებ, ვეწვიო საქართველოს შემოდგომაზე ჩრდილოატლანტიკურ საბჭოსთან ერთად და ეს არის მორიგი მაგალითი ნატო-ს ძლიერი მხარდაჭერა".

სტოლტენბერგის განმარტებით, ნატო ასევე აძლიერებს პარტნიორობის მხარდაჭერას აღმოსავლეთით:

"დღეს საღამოს შევხვდებით პრეზიდენტ პოროშენკოს ნატო-უკრაინის კომისიის სხდომაზე, რომ გადავწყვიტოთ, რისი გაკეთება შეგვიძლია ყველას ერთად. გუშინ კი საგარეო საქმეთა მინისტრები ნატო-საქართველოს კომისიის სხდომაზე შეიკრიბნენ და კიდევ ერთხელ გამოხატეს ჩვენი ძლიერი პოლიტიკური მხარდაჭერა".