ნატოს ვარშავის სამიტზე მყოფმა თავდაცვის მინისტრმა, თინა ხიდაშელმა განაცხადა, რომ ნატომ მიიღო გადაწყვეტილება ავღანეთის მტკიცე მხარდაჭერის მისიის ფორმატის გაგრძელებაზე და განმარტა, რომ საქართველოს პრეზიდენტმაც დაადასტურა საქართველოს პოზიცია, რომ ქართველი ჯარისკაცები რჩებიან იქ მისიის დასრულებამდე:

"პრეზიდენტმა ობამამაც განაცხადა, რომ აშშ რჩება ავღანეთში, მტკიცე მხარდაჭერის პროგრამაში და გააგრძელებს პარტნიორებთან ერთად აქტიურ მოქმედებებს, ერთი მხრივ, ავღანური არმიისა და ავღანეთის სამხედრო პოტენციალის გასაძლიერებლად და, მეორე მხრივ, ტერორიზმის წინააღმდეგ საბრძოლველად. მტკიცე მხარდაჭერის მისია გრძელდება ისე, როგორც დაგეგმილი იყო 2016 წლის დეკემბრამდე".

გარდა ამისა, ხიდაშელმა აღნიშნა, რომ დღეს ყველა ქვეყანამ დაადასტურა საკუთარი პასუხისმგებლობა 2020 წლამდე:

"გუშინდელ დღემდე საუბარი იყო მისიის 2018 წლის ბოლომდე გაგრძელებაზე, მაგრამ, როგორც ჩანს, გუშინ ნატოს წევრი ქვეყნები საბოლოოდ შეთანხმდნენ, რომ ეს ვალდებულება ასაღებია 2020 წლამდე. ბუნებრივია, თუ ყველაფერი კარგად იქნება ავღანეთში, ნებისმიერ მომენტში შეიძლება მისიის შეწყვეტა".

თავდაცვის მინისტრმა ასევე აღნიშნა, რომ ნატოს გადაწყვეტილების გამოქვეყნების შემდეგ გაირკვევა, დასჭირდება თუ არა მისიაში საქართველოს მონაწილეობის საკითხს საქართველოს პარლამენტის რატიფიკაცია.