საფრანგეთი, კანადა და ესტონეთი ანექსირებულ ყირიმში ჩატარებულ რუსეთის საპრეზიდენტო არჩევნებს გმობენ.

საფრანგეთის საგარეო საქმეთა სამინისტროს განცხადებით, ისინი უკრაინის ტერიტორიულ მთლიანობასა და სუვერენიტეტს მხარს უჭერს.

კანადის საგარეო უწყების განმარტებით, ყირიმის ანექსიის მეოთხე წლისთავზე ისინი უერთდებიან საერთაშორისო საზოგადოებას და უკრაინის ტერიტორიული მთლიანობის დარღვევას გმობენ.

ესტონეთის საგარეო საქმეთა მინისტრი, სვენ მიკსერი აღნიშნავს, რომ ანექსირებულ ყირიმში რუსეთის საპრეზიდენტო არჩევნების შედეგებს არ აღიარებს.

გუშინ, 18 მარტს უკრაინის ეროვნულმა გვარდიამ და პოლიციამ რუსეთის დიპლომატიურ წარმომადგენლობებთან, სადაც საარჩევნო უბნებია განთავსებული, წვდომა შეზღუდა. შენობაში შესვლა და საპრეზიდენტო არჩევნებისთვის ხმის მიცემა მხოლოდ დიპლომატიური პასპორტის მქონე მოქალაქეებს შეუძლიათ.

კიევში, ლვოვში, ოდესასა და ხარკოვში ოთხი საარჩევნო უბანი უნდა გახსნილიყო. თუმცა 16 მარტს უკრაინის შინაგან საქმეთა მინისტრმა, არსენი ავაკოვმა განაცხადა, უკრაინის მოქალაქეებს არჩევნებში ხმის მიცემა ეზღუდებათ.

ასეთი გადაწყვეტილება უკრაინამ მიიღო იმის გამო, რომ რუსეთმა ანექსირებულ ყირიმში არჩევნების ჩატარებაზე უარი არ განაცხადა.

სამართალდამცავებმა კიევში ვოზდუხოფლოტის პროსპექტი, სადაც რუსეთის საელჩოა განთავსებული, გადაკეტეს და დაცვა გააძლიერეს. ყირიმში მიმდინარე საპრეზიდენტო არჩევნების გამო საელჩოსთან საპროტესტო აქცია გამართეს.