ტელეკომპანია იმედზე გადაცემა "ღამის შოუ" იწყება. გადაცემის წამყვანი მსახიობი, გიორგი ბახუტაშვილი იქნება. ამის შესახებ ინფორმაცია ამავე არხზე, გადაცემა "იმედის კვირაში" გავიდა.

"ჩვენ ავიღეთ კლასიკური, ამერიკული ფორმატი", - განაცხადა იმედის გენერალურმა პროდიუსერმა, გიორგი ხაბურზანიამ. არხის ინფორმაციით, გადაცემის ფორმატი ჯიმი კიმელის შოუსთან იქნება მიახლოვებული.

ტელეკომპანია იმედზე დავით გოგიჩაიშვილის სტუდიის გადაცემა "ღამის შოუ" წლების წინ გადიოდა, შემდეგ ტელეკომპანია მაესტროზე გადაინაცვლა და დაიხურა. საქართველოში ამ ფორმატის გადაცემა პირველად რუსთავი 2-ის ეთერში 2003 წელს გავიდა, რომელსაც ასევე დავით გოგიჩაშვილის გუნდი ამზადებდა.