13 მარტს თურქეთის დედაქალაქში მომხდარი ტერაქტის შედეგად 37 ადამიანი დაიღუპა, ხოლო დაშავდა 125.

ბომბი ხალხმრავალ ადგილზე, თუქეთის შინაგან საქმეთა და იუსტიციის სამინისტროებთან ახლოს აფეთქდა. ეს უკვე აფეთქების მეორე შემთხვევაა ბოლო ერთი თვის განმავლობაში.

შემთხვევის ადგილიდან ამოღებული ნივთმტკიცებების საფუძველზე გამოძიებამ დაადგინა, რომ ტერაქტის შემსრულებელი ქურთთა მუშათა პარტიის წევრი, 1992 წელს დაბადებული ქალია.

17 თებერვალს განხორციელებულ აფეთქებაზე პასუხისმგებლობა ორგანიზაცია ქურთისტანის თავისუფლების მიმინოებმა აიღეს. ამ თავდასხმის შედეგად 29 ადამიანი დაიღუპა.

13 მარტის ტერაქტის საპასუხოდ თურქეთის არმიან ქურთთა მუშათა პარტიის ბანაკები დაბომბა. პარალელურად პოლიციის რეიდები ჩატარდა ქალაქ ადანაში, რომლის შედეგადაც მუშათა პარტიის 36 წევრი დააკავეს.

აფეთქებამდე ორი დღით ადრე აშშ-ს საელჩომ თურქეთში გაავრცელა ინფორმაცია, რომ არსებობდა ცნობები მოსალოდნელი ტერორისტული თავდასხმის შესახებ და აშშ-ს მოქალაქეებს ბახჩელიევლერის უბანში გადაადგილებისგან თავის შეკავება ურჩია. თუმცა ტერაქტი სხვა უბანში მოხდა.

გერმანიის საგარეო საქმეთა სამინისტრომ დღეს დილით ოფიციალური რეკომენდაცია გამოსცა და გერმანიის მოქალაქეებს თურქეთში მოგზაურობაზე თავის შეკავება ურჩია.

თურქეთის შინაგან საქმეთა სამინისტროს წარმომადგენლების განცხადებით გამოძიებიება გრძელდება. არსებული სამხილების თანახმად ტერაქტი ორმა ტერორისტმა შეასრულა.

ანკარაში მომხდარი ტერაქტი მსოფლიოს ლიდერებმა დაგმეს, მათ შორის საბრძნეთისა და ირანის ოფიციალურმა პირებმა.