თბილისის იუსტიციის სახლთან ქალთა სარვამარტო აქცია ტრანსგენდერი ქალების უფლებების დასაცავად დაიწყო. აქციაზე მისულია რამდენიმე ათეული ადამიანი.

როგორც აქციაზე მყოფმა ერთ-ერთმა ტრანსგენდერმა ქალმა, მირანდა ფაღავამ განაცხადა, პირადობის მოწმობაში მათი იდენტობისგან განსხვავებული სქესის მითითება მათ უფლებებს არღვევს. ფაღავამ მაგალითად ბანკი მოიყვანა, სადაც საბანკო მომსახურებებისთვის პირადობის მოწმობის ჩვენება უწევს ხოლმე. ამით ბანკის თანამშრომელი კლიენტისგან იმ ტიპის პერსონალურ ინფორმაციას იღებს, რომელსაც საბანკო მომსახურებასთან კავშირი არ აქვს.

ტრანსგენდერის უფლებების დაცვის მოთხოვნის პარალელურად იუსტიციის სახლთან ტრანსფობიური შინაარსის კონტრაქცია მიმდინარეობს. აქციის მონაწილეებს შორის პოლიციელები დგანან.

ფოტო: On.ge

როგორც On.ge-ის ჟურნალისტი ადგილიდან იუწყება, კონტრაქციის მონაწილეები ქალთა მოძრაობის აქციის მონაწილეებს კვერცხებს ესროდნენ. მათგან ერთ-ერთი, ჰომოფობიური და ქსენოფობიური გამონათქვამებით გამორჩეული, გურამ ფალავანდიშვილი პოლიციამ, სავარაუდოდ, წვრილმანი ხულიგნობის ბრალდებით დააკავა.

ადევნეთ თვალი On.ge-ის პირდაპირ ეთერს.