საქართველოს პარლამენტის ჯანდაცვის კომიტეტის თავმჯდომარე, აკაკი ზოიძე ნარკოპოლიტიკის რეფორმის გადადების შესახებ საუბრისას ამბობს, რომ დეპუტატების მხარდაჭერის გარეშე განხილვას აზრი არ აქვს. კანონპროექტის განხილვის ორი თვით გადადებასთან დაკავშირებით დეპუტატი On.ge-ს ესაუბრა.

დეპუტატის თქმით, უმრავლესობაში აზრთა სხვადასხვაობა რამდენიმე კომპლექსურ საკითხზეა. მათ შორის, მოხმარების დოზების განსაზღვრაზე, საპატიმრო სასჯელის გაუქმებასა და ნარკოტიკების მოხმარების წახალისების პრევენციაზე.

"გვჭირდება დრო, რომ შევჯერდეთ. პრინციპებზე ყველა ვთანხმდებით, რომ პრევენცია ნარკოპოლიტიკის ქვაკუთხედი უნდა იყოს. საკანონმდებლო კუთხით გამსაღებლის მიმართ მკაცრი დამოკიდებულება უნდა იყოს და მომხმარებლის მიმართ ზრუნვა დასჯის ნაცვლად", - აცხადებს აკაკი ზოიძე.

მისი თქმით, საკითხები, რომელზეც უმრავლესობა შეჯერებას ვერ ახერხებს, სხვა ქვეყნის პარლამენტებშიც ყოფილა განხილვის საგანი და ეს ლოგიკური პროცესია. დეპუტატი აღნიშნავს, რომ კანონით მოხმარება არ უნდა წახალისდეს და ამავდროულად, ნარკოტიკული საშუალებების მოხმარებით გამოწვეული ზიანი უნდა შემცირდეს.

"აზრი არ აქვს ნარკოპოლიტიკის რეფორმის განხილვას თუ არ არის შეჯერებული და წინასწარ მხარდაჭერილი როგორც პარლამენტის, ისე მთავრობის მიერ. ჩვენი გეგმა, სურვილი და ამოცანაა კანონი საზაფხულო სესიაზე მივიღოთ და ეს არ ნიშნავს, რომ გარანტირებულად მივიღებთ", - განუცხადა On.ge-ს აკაკი ზოიძემ.

თეთრი ხმაურის მოძრაობის აქტივისტის ბექა წიქარიშვილის თქმით, განხილვის გადადება ნიშნავს იმას, რომ პარლამენტს კანონპროექტის არსებული ფორმით მიღება არ სურს. On.ge-სთან საუბრისას მან პრემიერ-მინისტრის, გიორგი კვირიკაშვილი დაპირება გაიხსენა, რომლის მიხედვითაც კანონპროექტს შემოდგომის სესიაზე მიიღებდნენ.

5 მარტს ნარკოპოლიტიკის რეფორმის განხილვა პარლამენტში ისევ გადაიდო, ამჯერად ორი თვით. გადაწყვეტილება დეპუტატებმა ბიუროს სხდომაზე მიიღეს.

გაიგეთ მეტი: დეკრიმინალიზაციის მოლოდინში