აშშ-ის მოქმედი პრეზიდენტის, დონალდ ტრამპის ქონება, პრეზიდენტად მუშაობის ერთი წლის განმავლობაში $400 მილიონით შემცირდა. Forbes-ის უმდიდრესი ადამიანების რეიტინგით, ტრამპი 222 ადგილით დაქვეითდა და ამ წუთისთვის 766-ე ადგილს იკავებს. გამოცემის შეფასებით ტრამპის ქონება $3,1 მილიარდია.

ტრამპი აშშ-ს ყველაზე მდიდარი პრეზიდენტია, თუმცა წლევანდელი მონაცემებით, ტრამპის აშშ-ს უმდიდრესი 250 ადამიანის სიაშიც აღარ შედის. ტრამპის ქონების შემცირების მთავარ მიზეზად Forbes-ის ექსპერტები, მის უძრავ ქონებაზე ფასის დაცემას მიიჩნევენ. ძირითადად, საუბარია ნიუ-ორკში არსებულ სავაჭრო და საოფისე ცენტრებზე.

ბოლო ერთი წლის განმავლობაში, მეხუთე ავენიუზე განთავსებული Trump Tower-ის საბაზრო ღირებულება $41 მილიონით შემცირდა. ასევე, $137 მილიონით შემცირდა ე.წ. Niketown-ის შენობის ფასი. ამ შენობის ფასის შემცირების მიზეზად ექსპერტები Nike-ის ხელმძღვანელების გადაწყვეტილებას ასახელებენ. Nike-მა უარი თქვა შენობის არენდაზე, რის შედეგადაც დაახლოებით 7 ათასი კვადრატული მეტრი ფართობი გათავისუფლდა.

ტრამპის ქონების შემცირების ერთ-ერთ მიზეზად მის საპრეზიდენტო საქმიანობასაც ასახელებენ. გადაწყვეტილებები, რომელიც ტრამპმა პრეზიდენტის პოსტზე მიიღო ხელი შეუწყო ამერიკული საზოგადოების პოლარიზაციას და მის საკუთრებაში არსებულ სასტუმროებსა და გოლფ კლუბებში სტუმრების რიცხვის შემცირებას. პანამაში, ტორონტოსა და ნიუ-ორკში არსებულმა არაერთმა სასტუმრომ უარი თქვა ტრამპის გვარის გამოყენებაზე და შესაბამისი აბრები მოაშორა.