შინაგან საქმეთა მინისტრი გიორგი გახარია მიიჩნევს, რომ პოლიციელების წინააღმდეგ გაჟღერებული განცხადებები "ჩამიდეს", "მცემეს" დაცვის სტრატეგია გახდა:

"სამწუხაროდ მოგეხსენებათ, რომ ჩვენ სახელმწიფო ბოლო წლების განმავლობაში ხდება სულ უფრო და უფრო ჰუმანური, რაც მისასალმებელია და ხშირ შემთხვევაში ჩამიდეს, მცემეს ეს გარკვეული სტრატეგია ხდება დაცვის კომპონენტში."

გახარიას თქმით უწყების მიერ არა ჩადებას კამპანიაში ჩართვა ნიშნავს არა იმას, რომ სამინისტრო ჩადებების ფაქტს აღიარებს, არამედ იმას, რომ სამინისტროს ჩადება არ ჭირდება:

"არაფრის აღიარებას ეს არ ნიშნავს. ეს ნიშნავს ერთ რამეს, რომ ჩვენ ვაფიქსირებთ მარტივ პოზიციას, რომ ჩადება როგორც ასეთი არ არის სწორი და ჩვენ არ ვაპირებთ არავის ჩავუდოთ. პირველი იმიტომ, რომ ჩადება არის თითოეული კეთილსინდისიერი პოლიციელის შეურაცხყოფა. მისი ინტელექტის და მისი ეფექტურობის შეურაცხყოფა. ამიტომ ჩვენ ვამბობთ, რომ ჩადება ჩვენ არ გვჭირდება."

გახარიას თქმით, შინაგან საქმეთა სამინისტროს ექნება მკაცრი რეაგირება ჩადებების ფაქტზე, იმ შემთხვევაში თუკი ის დადასტურდება:

"გვაქვს ძალიან მარტივი და მემგონი ადვილად გასაგები მესიჯი, რომ ჩადება ჩვენ არ გვჭრდება ერთი, რომ ჩადებას არ ვაპირებთ ორი და სამი თუ ყველაფერი ხდება, მოხდება და დაფიქსირდება ასეთი ფაქტი, ჩვენ ვიქნებით პირველები და ყველაზე მკაცრები იმ შემთხვევაში როდესაც ასეთი ფაქტები დადასტურდება"