ტურიზმის ადმინისტრაციაში აცხადებენ, რომ ტოპ 15 საერთაშორისო ტურისტულ ვიზიტებში, მეზობელი ქვეყნების წილი 73%-ია და პირველი ადგილი ამ მხრივ რუსეთმა დაიკავა. მათი განმარტებით, ტურისტებში მოიაზრებიან ისინი, რომლებიც 24 საათი და მეტი ჩერდებიან ქვეყანაში. მეორე ადგილი დაიკავა აზერბაიჯანმა, ხოლო ვიზიტორების მხრივ პირველ ადგილზე მყოფი სომხეთი კი, მეოთხე ადგილზე გადავიდა.

2015 წლის განმავლობაში ტურიზმის 7%-იანი ზრდა იყო, რაც შეეხება ვიზიტორებს, მთლიანობაში საქართველოში 2015 წელს 5 901 091 პირი შემოვიდა. 2015 წლის ანგარიშის პრეზენტაცია ტურიზმის ეროვნულმა ადმინისტრაციამ დღეს გამართა.

ანგარიშის თანახმად, წინა წელთან შედარებით, რაოდენობრივად ვიზიტორები 385 535-ით გაიზარდა, ზრდაში კი ყველაზე დიდი წვლილი შეიტანეს:

  • სომხებმა (37%).
  • რუსებმა (30%).
  • აზერბაიჯანელებმა (29%).

ანგარიშის თანახმად, დადგინდა ისიც, რომ 87,8% მეზობელი ქვეყნებიდან შემოდის, რაც ჯამში 5 180 010 ვიზიტორია.

ჩამოსულთა რაოდენობით, ტოპ 5 ქვეყანას შორის არიან:

  • სომხეთი (1 468 888).
  • აზერბაიჯანი (1 393 257).
  • თურქეთი (1 391 721).
  • რუსეთი (926 144).
  • უკრაინა (141 734).

საერთაშორისო ვიზიტორებს შორის, რუსეთის მოქალაქეების რაოდენობა 115 528-ით გაიზარდა.

ევროკავშირის წევრი ქვეყნებიდან, ქვეყანაში შემოსულთა რაოდენობა 4,1%-ით გაიზარდა და მთლიანობაში ზრდამ 242 172 შეადგინა.

ქვეყანაში შემოსვლის სხვადასხვა ტიპების მიხედვით, ძირითადი წილი სახმელეთო საზღვარზე მოდის, შემდეგია საჰაერო, სარკინგზო და საზღვაო.

სახმელეთო გზას ყველაზე მეტად იყენებენ სომხები, აზერბაიჯანელები, თურქები, უკრაინელები, ირანელები, ბერძნები, ყაზახები და ბელორუსები. საჰაერო შემოსვლებში კი რუსეთი (21%) ლიდერია.

სტატისტიკის მიხედვით, ყველაზე დატვირთული საზღვარია სარფი, საიდანაც სულ 1 406 998 ვიზიტორი შემოვიდა.