პარტია ევროპულ საქართველოში მიაჩნიათ, რომ ფაროსანას წინააღმდეგ საგანგებო მდგომარეობა უნდა გამოცხადდეს. ამის შესახებ პარტიის წევრმა, გიგი უგულავამ დღეს გამართულ ბრიფინგზე განაცხადა:

"გამოსაცხადებელია ტოტალური ბრძოლა. გამოსაცხადებელია საგანგებო მდგომარეობა მთელ იმ რეგიონებში, სადაც ამის ალბათობა არის მაღალი. ამის გარეშე შეუძლებელი იქნება [ფაროსანას] შეკავება და გაისად შეიძლება იგივე პრობლემა მივიღოთ ქართლში, სადაც ვაშლის მოსავალს ემუქრება საფრთხე და შემდეგ უკვე კახეთში - ყურძნის მოსავალს."

უგულავას თქმით, ფაროსანამ, გასულ წელს, დიდი ზიანი მიაყენა საქართველოს მოქალაქეებსა და ეკონომიკას და ხელისუფლების არასწორი ხედვის გამო წელს სიტუაცია მხოლოდ გაუარესდება. მისივე აზრით, საჭიროა:

  • სახელმწიფო სტრუქტურებში დასაქმებული ხალხისა და მოხალისეების მასობრივი მობილიზება;
  • გამოიყოს დამატებითი ფინანსური რესურსი, რადგან კატასტროფის მასშტაბებიდან გამომდინარე საჭიროა კომპენსაციებზე მუშაობა;
  • ფაროსანასთან ბრძოლაზე დამყარდეს კომუნიკაცია მეზობელ ქვეყნებთან, რადგან მის წინააღმდეგ ბრძოლა მათ ინტერესებშიცაა.

აზრიური ფაროსანა მავნებელი მწერია, რომელიც ანადგურებს ხილსა და ბოსტნეულს ნებისმიერ სეზონზე. ამ მავნებელმა უკვე მიაყენა მნიშვნელოვანი ზიანი დასავლეთ საქართველოს მოსახლეობას. სოფლის მეურნეობის მინისტრის განცხადებით, ფაროსანა მწერია და მასზე ამდენი ყურადღების გამახვილება გადაჭარბებულია.