აჭარის მთავრობის ყოფილი თავჯდომარე, ლევან ვარშალომიძე არ ადასტურებს, რომ არჩილ ხაბაძის მიერ თანამდებობის შესაძლო დატოვება სწორედ მის საქართველოში დაბრუნებას უკავშირდება. გადაცემა არჩევანში საუბრისას მან განმარტა, რომ ხაბაძის აჭარის მთავრობის თავჯდომარის თანამდებობაზე ყოფნა ძალიან არასერიოზულია და მიიჩნევს, რომ არ აქვს მნიშვნელობა მას დღეს თუ ხვალ გაუშვებენ, რადგან რეგიონში არსებული სიტუაცია ძალიან მძიმეა.

ვარშალომიძემ განაცხადა, რომ მისი საქართველოში დაბრუნების მიზანია საარჩევნო კამპანიას სათავეში ჩაუდგეს იმისთვის, რომ 2016 წლის საპარლამენტო არჩევნები თავის გუნდთან ერთად მოიგოს:

"ჩვენ გვაქვს ეს მიზანი: 8 ოქტომბერს უნდა მოვიგოთ [არჩევნები] და 9 ოქტომბერს უკვე დავიწყოთ ჩვენი გეგმის განხორციელება. ქვეყანას და რეგიონს დრო დასაკარგი არ აქვს".

მას შემდეგ, რაც დღეს აჭარის მთავრობის თავჯდომარის, არჩილ ხაბაძის იმპიჩმენტი ვერ შედგა, მან აღნიშნული თანამდებობა შესაძლოა ხვალ დატოვოს. ნაციონალური მოძრაობა კი მიიჩნევს, რომ ხაბაძის მიერ თანამდებობის შესაძლო დატოვება ლევან ვარშალომიძის ბათუმში დაბრუნებას უკავშირდება.