დიდი პატარა ტყუილების პირველი სეზონის მსახიობები, შეილინ ვუდლი, ლორა დერნი და ზოე კრავიცი მეორე სეზონშიც დაგვიბრუნდებიან. ინფორმაცია HBO-მ ოფიციალურად დაადასტურა.

ინფორმაციას გამოეხმაურა ნიკოლ კიდმანიც. "ძალიან ბენიერი ვარ, რომ ჩემს დებთან ერთად ისევ ვიმუშავებ" - დაწერა მან ფეისბუქზე.

სერიალში ძველი მსახიობების, ნიკოლ კიდმანისა და რიზ უიზერსპუნის, გარდა მერილ სტრიპიც იქნება და ის სელესტის [ნიკოლ კიდმანის გმირი] დედამთილის როლს შეასრულებს. რიზი და ნიკოლი სერიალის პროდიუსერებიც იქნებიან.

ძველი კონტრაქტის მიხედვით, მსახიობები მხოლოდ პირველ სეზონში უნდა ყოფილიყვნენ, თუმცა მეორე სეოზნში დაბრუნებით მათი ჰონორარი გაიზრდება.

მეორე სეზონის სცენარი კვლავ ტყუილების, მტკიცე მეგობრობის, არამყარი ქორწინებისა და დედობის თემის გარშემო განვითარდება.

BLL-ს მეორე სეზონის აქცენტები

მერილ სტრიპის გმირი პირველ სეზონში დაღუპული პერის დედა იქნება და მერი ლუის რაიტი ერქმევა. კასტინგი მიმდინარეობს ბონის მამის როლზეც. როგორც ცნობილია, სერიალში ბევრი ახალი სახე იქნება. მიუხედავად პირვე სეზონში სიკვდილისა, მეორე სეზონის კონკრეტულ ეპიზოდებში დაბრუნდება ალექსანდრ სკარსგარდიც.

ახალ პერსონაჟებს შორის ერთ-ერთი მასწავლებელი მიშელ პერკინსი იქნება. აქვე უნდა ითქვას ისიც, რომ ამ მასწავლებელს პრობლემები ექნება ლორა დერნის გმირთან, რენატასთან.

ახალ სეზონთან დაკავშირებით ცნობილია ისიც, რომ მეორე ნაწილის რეჟისორი ანდრეა არნოლდი იქნება, რომელსაც ისეთ პროექტებზე უმუშავია როგორებიცაა - Transparent, I Love Dick და სხვები.

სერიალის ეთერში დაბრუნების ზუსტი თარიღი ჯერ უცნობია. დიდი პატარა ტყუილების მეორე სეზონშ, პირველის მსგავსად, 7 სერია იქნება.