საქართველოს ახალგაზრდა იურისტთა ასოციაციამ საზოგადოებრივ მაუწყებელს კომუნიკაციების ეროვნულ კომისიაში უჩივლა. საიას მიაჩნია, რომ მაუწყებელმა მათი სოციალური რეკლამა კანონდარღვევით არ განათავსა.

არასამთავრობო ორგანიზაციაში ამბობენ, რომ ვიდეორგოლი მიზნად ისახავს მოსახლეობის ინფორმირებას 1984 წელს მიღებული სამართალდარღვევათა კოდექსის ცვლილების საჭიროების თაობაზე.

მაუწყებლობის შესახებ კანონით, სოციალური რეკლამის განთავსების ვალდებულება ყველა მაუწყებელზე, მათ შორის საზოგადოებრივ მაუწყებელზეც ვრცელდება. სოციალურ რეკლამასთან დაკავშირებულ დავებს კი კომუნიკაციების კომისია განიხილავს.

როგორც საიას პრესსამსახურმა On.ge-ს უთხრა, სოციალური რეკლამის განთავსებით მათ სხვა მაუწყებლებსაც მიმართეს. რუსთავი 2-სა და ტვ პირველზე რეკლამა უკვე გადის, ხოლო იბერიასა და კავკასიაზე მალე განთავსდება. მათი თქმით, ერთადერთი საზოგადოებრივი მაუწყებელი იყო, რომელმაც უარი უთხრათ.

მსგავსი საჩივრით კომისიას საზოგადოებრივი მაუწყებლის წინააღმდეგ ადამიანის უფლებათა ცენტრმა რამდენიმე თვის წინ მიმართა. მაშინ კომისიამ მაუწყებელს სოციალური რეკლამის განთავსება დაავალა.