ციანიდის საქმის პროკურორმა სააპელაციო სასამართლოს გადაწყვეტილების გამოცხადების შემდეგ აღნიშნა, რომ გასაჩივრების შესახებ სამოტივაციო ნაწილის ჩაბარების შემდეგ მიიღებენ გადაწყვეტილებას:

"ერთი წლის განმავლობაში ორი ინსტანციის სასამართლომ მიიღო გადაწყვეტილება და ყველა კითხვას გასცა პასუხი. ვინ თუ არა, გიორგი მამალაძემ შესანიშნავად იცის რომ დამნაშავეა და გადაწყვეტილების გამოცხადებაზეც კი არ მოვიდა".

სააპელაციო სასამართლომ უცვლელი დატოვა საქალაქო სასამართლოს გადაწყვეტილება და დეკანოზი გიორგი მამალაძე 9-წლიან პატიმრობაში დატოვა.

გადაწყვეტილების გასაჩივრებას გეგმავს დაცვის მხარე. დეკანოზ გიორგი მამალაძის ადვოკატი, მიხეილ რამიშვილი ამბობს, რომ სააპელაციო სასამართლოს გადაწყვეტილებას უზენაეს სასამართლოში გაასაჩივრებენ.

"სასამართლო საქართველოში არ არსებობს. იმედი გვქონდა რომ რეანიმაციაში იყო, მაგრამ გარდაცვლილია. ქვეყანაში არა არსებობს დამოუკიდებელი, სამართლიანი მოსამართლე. ეს შეკვეთის და დავალების გაგრძელებაა", - განაცხადა რამიშვილმა.