Bitfury ჯგუფმა გლდანის თავისუფალი ინდუსტრიულ ზონაში მდებარე დატაცენტრი აზიურ კომპანიას Chong Sing Holdings მიჰყიდა.

Bitfury-ის აღმასრულებელი დირექტორის, ვალერი ვავილოვის თქმით, 40 მგვტ დატაცენტრის გაყიდვის მიზანი კომპანიის აზიურ ბაზარზე სტრატეგიული გაფართოებაა:

"ეს გარიგება აღრმავებს ურთიერთობებს ჩინელ პარტნიორებთან და ეხმარება Bitfury-ის აზიურ ბაზარზე წარმატებულ გაფართოებაში."

Bitfury ბიტკოინის მაინინგის ბიზნეს სეგმენტში ერთ-ერთი ყველაზე დიდი მოთამაშე და ბლოკჩეინის ტექნოლოგიების მოწინავე კომპანიაა. ის, ასევე, არის ერთ-ერთი ყველაზე დიდი ინფრასტრუქტურული კერძო პროვაიდერი ბლოკჩეინის ეკოსისტემაში. ბიტფური ჯგუფს 2015 წელს, პრემიერმინისტრ ღარიბაშვილის გადაწყვეტილებით, გლდანში სიმბოლურ ფასად, ერთ ლარად გადაეცა 18,5 ჰექტარი მიწა კრიპტოვალუტა ბიტკოინის მომპოვებელი ცენტრის ასაშენებლად. მაშინ აღნიშნულმა კომპანიამ სესხი მიიღო ივანიშვილის ინიციატივით დაფუძნებული თანაისნვესტირების ფონდისგან.

Chong Sing Holdings კი ფინანსური ტექნოლოგიების წამყვანი კომპანიაა, რომელიც მომხმარებლისთვის ონლაინ ფინანსური სერვისების 24/7-ზე შეთავაზებაზეა ფოკუსირებული. ჰოლდინგის აქციები ჰონგ კონგის საფონდო ბირჟაზე ივაჭრება.