საქართველოს საგარეო საქმეთა მინისტრი, მიხეილ ჯანელიძე ამბობს, რომ რამდენიმე ქვეყანაში საქართველოდან თავშესაფრის მაძიებლების გაზრდასთან დაკავშირებით ინფორმაცია მიიღეს. ამის შესახებ მინისტრმა სამინისტროს ორგანიზებით გუდაურში გამართულ შეხვედრაზე On.ge-ს დასმულ კითხვაზე უპასუხა .

მინისტრის თქმით, საქართველოდან თავშესაფრის მაძიებელთა საკითხზე ყველა ქვეყანასთან ორმხრივ რეჟიმში მიმდინარეობს საუბარი.

"ჩვენ ვითვალისწინებთ ყველა იმ წუხილს, რომელიც შეიძლება ევროკავშირის წევრ ქვეყნებს ქონდეთ. დღეს, ნამდვილად არ არის ის მოცემულობა, როდესაც შეიძლება ამოქმედდეს მექანიზმი ვიზალიბერალიზაციის შეჩერების, მაგრამ აუცილებელია, რომ იმ სტატისტიკას, რომელიც მზარდია თავშესაფრის მაძიებელთა მიმართულებით ჩვენ განსაკუთრებული აქცენტები და ყურადღება მივაქციოთ."

მინისტრის თქმით, გუშინ, 9 თებერვალს, მთავრობის სხდომაზე განიხილეს ის ნაბიჯები, რომელთა გადადგმაც იგეგმება, რათა თავშესაფრის მაძიებელთა რაოდენობა კიდევ უფრო არ გაიზარდოს:

"ჩვენ ვიმუშავებთ შიდა რეგულაციებზე, რომელიც შესაბამის მექანიზმებს გააჩენს, რათა არ მოხდეს ამ რეჟიმის არაკანონიერად გამოყენება."

თავშესაფრის მინიჭების ევროპული სააგენტოს (EASO) სტატისტიკით, 2016 წელთან შედარებით, 2017 წელს ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35 პროცენტით გაიზარდა. გერმანიის საზოგადოებრივი მაუწყებლის ინფორმაციით კი, გაზრდილი კრიმინალის მიზეზით, გერმანიის ჩრდილოეთ რაინ-ვესტფალიის მთავრობას სურს, რომ საქართველოს მოქალაქეებს უვიზო რეჟიმი შეეზღუდოთ.