თბილისის საქალაქო სასამართლომ დიდი ოდენობით სხვისი ფულადი თანხის მოტყუებით დაუფლების მცდელობისთვის ბრალდებული კრწანისის რაიონის ყოფილი გამგებლის მოადგილე დამნაშავედ სცნო და 7-წლიანი პატიმრობა მიუსაჯა.

ბრალდებულს 2015 წლის 29 ოქტომბრიდან კრწანისის რაიონის გამგებლის მოადგილის თანამდებობა ეკავა.

ბრალდების მხარის მტკიცებით, დაკავებული დაინტერესებულ პირს დაპირდა სახელმწიფოს საკუთრებაში არსებული მიწის ნაკვეთის აუქციონზე გატანას და შეძენის შემდგომ სასტუმროს მშენებლობის ნებართვის მიღებაში დახმარებას, სანაცვლოდ კი 50 000 აშშ დოლარის გადაცემა მოსთხოვა.

პროკურატურის ცნობით, სამართალდამცველებმა ის 2015 წლის 16 დეკემბერს, მოთხოვნილი 50 000 დოლარის მიღებისთანავე დააკავეს.

მას ბრალდება საქართველოს სისხლის სამართლის კოდექსის 338-ე მუხლის მესამე ნაწილის „ე“ ქვეპუნქტით (განსაკუთრებით დიდი ოდენობით ქრთამის აღება) წარედგინა.