ღუდუშაურის კლინიკის, კრიტიკული მედიცინის დეპარტამენტის ხელმძღვანელის ნიკოლოზ ქარცივაძის განცხადებით, დოდო გუგეშაშვილი მართვით სუნთქვაზე იმყოფება და პაციენტის მდგომარეობა მძიმე, მაგრამ სტაბილურია.

გადაუდებელი ოპერაციის შემდეგ, გუგეშაშვილი კრიტიკული მედიცინის დეპარტამენტში განაგრძობს მკურნალობას.

აფხაზეთის ომის ვეტერანი და ყოფილი მხედრიონელი, დოდო გუგეშაშვილი სახლში ცეცხლსასროლი იარაღით დაჭრეს, მისი შვილი კი მოკლეს. ინციდენტი გუგეშაშვილის სახლში, თბილისში მოხდა.

შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა, მამუკა ჭელიძემ განაცხადა, რომ თავდამსხმელი, სავარაუდოდ, დოდო გუგეშაშვილის ოჯახს იცნობდა.

საქმეზე გამოძიება სისხლის სამართლის კოდექსის 109-ე დამამძიმებელ გარემოებაში მკვლელობის მუხლით მიმდინარეობს.