აშშ-ის პრეზიდენტმა, დონალ ტრამპმა პენტაგონს ვაშინგტონში სამხედრო აღლუმის ჩატარება დაავალა. ტრამპმა ამის შესახებ სამხედრო შტაბების ხელმძღვანელებთან შეხვედრის დროს ისაუბრა.

ზოგადად, ვაშინგტონში სამხედრო აღლუმი სამხედრო კონფლიქტის დამთავრების აღსანიშნავად იმართება. დემოკრატიული პარტიის წარმომადგენლებმა უკვე განაცხადეს, რომ აღლუმის იდეა მათ აგონებთ თუ როგორ იქცევიან ავტორიტარული რეჟიმები.

ინფორმაცია პირველად ამის შესახებ Washington Post-მა გაავრცელა. თეთრი სახლის პრესმდივანმა სარა სანდერსმა განაცხადა, რომ პრეზიდენტი ტრამპი მხარდაჭერას უცხადებს ყველა იმ სამხედრო მოსამსახურეს, რომელიც ქვეყნის უსაფრთხოებისთვის ყოველდღიურად თავს წირავს.

ადგილობრივი პრესა ტრამპის ამ გადაწყვეტილებას იმით ხსნის, რომ შარშან პარიზში ბასტილიის დღესთან დაკავშირებით მოწყობილი აღლუმით პრეზიდენტი აღფრთოვანებული იყო.

"ეს იყო ერთ-ერთი საუკეთესო აღლუმი. ჩვენ მოგვიწევს, რომ უკეთესის გაკეთება ვცადოთ", - განაცხადა მან აღლუმის შემდეგ.

მსგავსი აღლუმები აშშ-სა და დასავლეთის ქვეყნებში ძალიან იშვიათად ტარდება. სიტყვა "სამხედრო აღლუმი" კი ჩრდილოეთ კორეასთან ასოცირდება.

ბოლო აღლუმი ვაშინგტონში 1991 წელს, ჯორჯ ბუშ უფროსის პრეზიდენტობისას ჩატარდა. მათ ქუვეითის გათავისუფლება და სპარსეთი ყურეში ომის დასრულება აღნიშნეს.