ქურდული სამყაროს წევრისთვის მიმართვა, ქურდული სამყაროს მხარდაჭერა, ქურდული შეკრების ორგანიზება ან მასში მონაწილეობა - ეს ის ქმედებებია, რომლებიც ახალი კანონპროექტის თანახმად დასჯადი გახდება.

ქურდული სამყაროს წინააღმდეგ მიმართული კანონპროექტი პარლამენტს გადაეგზავნა. ცვლილებები სისხლის სამართლის კოდექსში და ორგანიზებული დანაშაულისა და რეკეტის შესახებ კანონში შევა. კერძოდ, დანაშაულად ცხადდება:

  • ქურდული სამყაროს წევრისთვის მიმართვა - სისხლის სამართლის წესით დაისჯება ნებისმიერი პირი, რომელიც ქურდული სამყაროს წევრს ან კანონიერ ქურდს მიმართავს დავის მოგვარების ან/და გადაწყვეტილების მიღებაზე გავლენის მოხდენის მიზნით;
  • ქურდული სამყაროს მხარდაჭერა - ნებისმიერი ქმედება, რომელიც ხელს უწყობს ქურდული სამყაროს საქმიანობის განხორციელებას;
  • ქურდული შეკრების ორგანიზება ან მასში მონაწილეობა - სისხლის სამართლის წესით დაისჯება ნებისმიერი პირი, რომელიც, ქურდული სამყაროს საქმიანობასთან დაკავშირებული საკითხების განხილვა/გადაწყვეტის მიზნით, მსგავს შეკრებას დააორგანიზებს ან მასში მონაწილეობას მიიღებს.

ასევე, მოქმედი კანონმდებლობით, "კანონიერ ქურდობაზე" თავისუფლების აღკვეთა არის 7-დან 10 წლამდე, საკანონმდებლო ცვლილებების შემდეგ იქნება 9-დან 15 წლამდე. ხოლო "ქურდული სამყაროს" წევრობაზე არის თავისუფლების აღკვეთა 5-დან 8 წლამდე, ცვლილების შედეგად იქნება - 7-დან 10 წლამდე.

ქურდული სამყაროს წევრობისა და კანონიერი ქურდობისთვის სასჯელის გამკაცრება შს მინისტრის, გიორგი გახარიას ინიციატივაა.