2017 წლის ბოლო სამი თვის განმავლობაში ფეისბუქის ერთ-ერთი მთავარი პარამეტრი დაახლოებით 5%-ით შემცირდა, რაც იმას ნიშნავს, რომ მომხმარებლები ჯამურად 50 მილიონი საათით ნაკლებს ატარებენ სოციალურ ქსელში.

მარკ ცუკერბერგის სიტყვებით, ამ სტატისტიკაში საგანგაშო არაფერია. ფეისბუქი ზრდას განაგრძობს და მთავარი არა გატარებული დროის რაოდენობა, არამედ ხარისხია. თუმცა ფაქტია, რომ რეკლამის განმთავსებლებისათვის ეს მნიშვნელოვანი სტატისტიკაა.

"2017 წელი წარმატებული გამოდგა, თუმცა სირთულეებიც იყო. 2018 წლისთვის კი ჩვენი მიზანია, ფეისბუქი მხოლოდ სახალისო კი არა, სასარგებლოც იყოს ადამიანებისა და საზოგადოებისთვის. ადამიანებს ხელს შევუწყობთ, რომ მეგობრებთან კავშირი გააღრმავონ, ნაცვლად კონტენტის პასიური მოხმარებისა", - აღნიშნა ცუკერბერგმა ბოლო განცხადებაში.

ექსპერტების აზრით, კლება ვირუსული ვიდეოების მიწოდების შემცირებამ გამოიწვია. ბოლო სტრატეგიის თანახმად, ჩვენს ნიუსფიდში ნაკლები ვირუსული ვიდეო ჩანს გარდა იმ შემთხვევებისა, როცა კომენტარების სექციაში აქტიურად მიმდინარეობს დიალოგი.

ფეისბუქს ამჟამად ყოველდღიურად 1.4 მილიარდი ადამიანი მოიხმარს.