საქართველოს პრეზიდენტის მრჩეველი პოლიტიკურ საკითხებში, ფიქრია ჩიხრაძე საპარლამენტო უმრავლესობის ინიციატივას გამოეხმაურა. დღეს, 29 იანვარს გამართულ ბრიფინგზე მან თქვა, რომ სისტემური დანაშაულის შესაჩერებლად საჭიროა ყველა იმ რგოლში ცვლილებების გატარება, რომელიც ამ სისტემური დანაშაულის პროცესში იყო ჩართული:

"სისტემური დანაშაული მრავალპლანიანია და მას ჰყავდა შესაბამისი სისტემური აღმსრულებლები. ესენი არიან ის პროკურორები, რომლებიც მთავარ ღერძს წარმოადგენდნენ სისტემრი დანაშაულის აღსრულებისას. იმ სპეცსამსახურების წარმოადგენლები, რომლებიც ჩართულნი იყვნენ მთელ რიგ უკანონო ქმედებებში, ასევე უნდა ჩამოშორდნენ სისტემას".

ფიქრია ჩიხრაძის თქმით, ჩადენილ დანაშაულთა მიმართ განხორციელებული მართლმსაჯულება იყო არა რეალური, არამედ მართლმსაჯულების იმიტაცია. მისივე თქმით რეალური მართლმსაჯულების აღსასრულებლად ეფექტიანი მექანიზმებია საჭირო. მან ასევე აღნიშნა, რომ ცალკეულ საქმეებზე უნდა დაიწყოს გამოძიება.

დღეს, საპარლამენტო უმრავლესობის წევრმა, მამუკა მდინარაძემ ბრიფინგზე განაცხადა, რომ ფრაქცია ქართული ოცნება ახალ საკანონმდებლო პაკეტზე იწყებს მუშაობას, რომელსაც "გირგვლიანი შესწორება" უწოდა.

"ფრაქცია იწყებს მუშაობას საკანონმდებლო ინიციატივათა პაკეტზე, რომელიც, ერთი მხრივ, უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორე მხრივ, უზრუნველყოფს მართლმსაჯულების ხელშეუვალობას - ეს იქნება ცვლილებების მთავარი არსი", - განაცხადა მდინარაძემ.

მდინარაძემ ასევე თქვა, რომ პრეზიდენტი გიორგი მარგველაშვილი წინამორბედის დაცვაში ისე შორს წავიდა, სააკაშვილი შერჩევითი მართლმსაჯულებისა და პოლიტიკური დევნის მსხვერპლადაც კი გამოაცხადა.